ગાંધીનગરના ગીર ફાઉન્ડેશને વિશ્વ સિંહ દિવસ 2025ની ભવ્ય ઉજવણી કરી. આ ઇવેન્ટમાં હેપ્પી યુથ ક્લબના 40થી વધુ સભ્યોએ ભાગ લીધો. જાણો આ દિવસની ઉજવણી અને ગુજરાતમાં સિંહોની સંખ્યા 891 સુધી કેવી રીતે પહોંચી.
ગાંધીનગર, સોમવાર
દર વર્ષે 10 ઓગસ્ટના રોજ, સમગ્ર વિશ્વમાં સિંહોના સંરક્ષણ અને જાગૃતિ માટે વિશ્વ સિંહ દિવસની ઉજવણી કરવામાં આવે છે. આ દિવસે, જંગલના રાજા ગણાતા સિંહોના મહત્વ પર ભાર મૂકવામાં આવે છે. આ વર્ષે, ગાંધીનગરમાં આવેલી પ્રતિષ્ઠિત ‘ગીર’ ફાઉન્ડેશન દ્વારા આ દિવસની ખાસ ઉજવણી કરવામાં આવી હતી.
આ ઉજવણીના ભાગરૂપે, ઇન્દ્રોડા પ્રકૃતિ ઉદ્યાનમાં એક ખાસ કાર્યક્રમનું આયોજન થયું હતું. જેમાં “Feel the Roar, Heal the Fear – Info Talk on Lion and Nature Trail” નામની ઇવેન્ટ યોજાઈ હતી. આ કાર્યક્રમમાં હેપ્પી યુથ ફાઉન્ડેશન સંચાલિત હેપ્પી યુથ ક્લબ, ગાંધીનગરના લગભગ 40 જેટલા સભ્યો અને તેમના પરિવારો જોડાયા હતા. આ તમામ લોકોને સિંહોના ઇકોસિસ્ટમમાં મહત્વ અને તેમના સંરક્ષણ વિશે માહિતી આપવામાં આવી હતી.
ગીર ફાઉન્ડેશનના પ્રયત્નો અને જનભાગીદારીનું પરિણામ એ છે કે ગુજરાતમાં એશિયાટિક સિંહોની સંખ્યામાં નોંધપાત્ર વધારો થયો છે. ચાલુ વર્ષે થયેલા વસ્તી અંદાજ મુજબ, ગુજરાતમાં સિંહોની કુલ સંખ્યા 891 પર પહોંચી છે, જે ગુજરાત માટે ગૌરવની વાત છે. આ સફળતા પાછળ ગીર ફાઉન્ડેશન અને વન વિભાગનો અવિરત પ્રયાસ સ્પષ્ટપણે દેખાઈ આવે છે.
આ દિવસની ઉજવણીમાં, પાર્કની મુલાકાત લેનારા મુલાકાતીઓ માટે વીડિયો પ્રેઝન્ટેશનની પણ વ્યવસ્થા કરવામાં આવી હતી. જેમાં એશિયાટિક સિંહો પરના ઇન્ફોર્મેટિવ વીડિયો બતાવવામાં આવ્યા હતા. બાળકો માટે ખાસ કરીને વાઇલ્ડલાઇફ ઓરિગામીનો એક વર્કશોપ પણ યોજાયો હતો. જેમાં ઓરિગામી આર્ટિસ્ટની મદદથી બાળકોએ કાગળમાંથી વિવિધ પ્રાણીઓ બનાવતા શીખ્યા હતા. આ પ્રવૃત્તિઓએ બાળકોમાં વન્યજીવન પ્રત્યે રસ અને જાગૃતિ વધારવામાં મદદ કરી.
