India Olympics 2036: વડાપ્રધાન નરેન્દ્ર મોદીએ જાહેરાત કરી છે કે ભારત 2036 ઓલિમ્પિક અને 2030 કોમનવેલ્થ ગેમ્સની યજમાની માટે સજ્જ છે. વારાણસીમાં વોલીબોલ ચેમ્પિયનશિપ દરમિયાન તેમણે આ મોટી વાત કહી. વાંચો વિગતે.
નવી દિલ્હી, સોમવાર
India Olympics 2036: ભારત હવે રમતગમતની દુનિયામાં એક મોટી છલાંગ લગાવવા જઈ રહ્યું છે. વડાપ્રધાન નરેન્દ્ર મોદીએ એક મોટી જાહેરાત કરતા જણાવ્યું હતું કે, ભારત 2036 ઓલિમ્પિક ગેમ્સની યજમાની મેળવવા માટે પૂરી ગંભીરતા અને તાકાત સાથે તૈયારી કરી રહ્યું છે. પીએમ મોદીએ દેશવાસીઓને ભરોસો અપાવ્યો છે કે ભારત આ સૌથી મોટા ઇન્ટરનેશનલ ખેલ મહાકુંભ માટે દરેક સ્તરે પોતાની જાતને તૈયાર કરશે.
2030 કોમનવેલ્થ ગેમ્સનું યજમાન બનશે ભારત
માત્ર ઓલિમ્પિક જ નહીં, પીએમ મોદીએ રમતપ્રેમીઓ માટે બીજી એક ખુશખબર પણ આપી છે. તેમણે સ્પષ્ટ કર્યું કે, 2030ની કોમનવેલ્થ ગેમ્સનું આયોજન ભારતમાં કરવામાં આવશે. આ જાહેરાત દર્શાવે છે કે ભારત હવે વૈશ્વિક રમતગમતના નકશા પર એક પાવરહાઉસ તરીકે ઉભરી રહ્યું છે.
વડાપ્રધાને વારાણસીમાં શરૂ થયેલી 72મી નેશનલ વોલીબોલ ચેમ્પિયનશિપ ના ઉદ્ઘાટન સમારોહને વીડિયો કોન્ફરન્સ દ્વારા સંબોધિત કરતી વખતે આ વાત કહી હતી. તેમણે કહ્યું કે, “છેલ્લા 10 વર્ષોમાં ભારતમાં રમતગમતના ક્ષેત્રમાં જબરદસ્ત પરિવર્તન આવ્યું છે. આ સમયગાળા દરમિયાન દેશે અલગ-અલગ શહેરોમાં 20 થી વધુ મોટા ઇન્ટરનેશનલ સ્પોર્ટ્સ ઇવેન્ટ્સ નું સફળ આયોજન કર્યું છે.”
આ સફળ આયોજનોમાં નીચે મુજબની ઇવેન્ટ્સ સામેલ છે:
U-17 FIFA વર્લ્ડ કપ
હોકી વર્લ્ડ કપ
મોટી ચેસ ટુર્નામેન્ટ્સ
વારાણસીમાં વોલીબોલનો મહાકુંભ: 1000 ખેલાડીઓ લેશે ભાગ
પીએમ મોદીએ જે કાર્યક્રમમાં આ વાત કહી તે નેશનલ વોલીબોલ ચેમ્પિયનશિપ 4 જાન્યુઆરીથી 11 જાન્યુઆરી સુધી ચાલશે. આ ટુર્નામેન્ટમાં દેશના ખૂણે-ખૂણેથી આવેલી 58 ટીમો ભાગ લઈ રહી છે. જેમાં 1,000 થી વધુ ખેલાડીઓ પોતાની રમતનું કૌશલ્ય બતાવશે.
એક સત્તાવાર નિવેદનમાં જણાવવામાં આવ્યું છે કે, આ ટુર્નામેન્ટ ભારતીય વોલીબોલમાં સ્પોર્ટ્સમેનશિપ અને ટેલેન્ટનું ઊંચું સ્ટાન્ડર્ડ પૂરું પાડશે તેવી અપેક્ષા છે. વારાણસીમાં નેશનલ લેવલની વોલીબોલ ટુર્નામેન્ટનું આયોજન એ સાબિત કરે છે કે શહેરમાં સ્પોર્ટ્સ ઇન્ફ્રાસ્ટ્રક્ચર મજબૂત થઈ રહ્યું છે. સાથે જ વારાણસી હવે માત્ર સાંસ્કૃતિક નગરી જ નહીં, પરંતુ મોટા નેશનલ સ્પોર્ટ્સ ઇવેન્ટ્સના હબ તરીકે પણ પોતાની ઓળખ બનાવી રહ્યું છે.
