યમનની રાજધાની સનામાં ઇઝરાયલી હવાઈ હુમલા કરવામાં આવ્યા હતા. સ્થાનિક મીડિયા અહેવાલોમાં આ માહિતી આપવામાં આવી હતી.
રવિવારે વહેલી સવારે યમનની રાજધાની સનામાં ઇઝરાયલી હવાઈ હુમલા કરવામાં આવ્યા હતા. સ્થાનિક મીડિયા અહેવાલોમાં આ માહિતી આપવામાં આવી હતી. સમાચાર અનુસાર, ઇઝરાયલનો આ હુમલો ઇરાન સમર્થિત બળવાખોરો દ્વારા ઇઝરાયલ પર ક્લસ્ટર બોમ્બ ફેંકાયાના થોડા દિવસો પછી જ થયો છે.
હુથી બળવાખોરો દ્વારા સંચાલિત ‘અલ-મસિરાહ ચેનલ’ એ આ હુમલાઓની જાણ કરી છે. 17 ઓગસ્ટ પછી બળવાખોરોના કબજા હેઠળના સના પર આ પહેલો હુમલો છે. ઇઝરાયલે તે સમયે કહ્યું હતું કે આ હુમલાઓમાં પાવર પ્લાન્ટને નિશાન બનાવવામાં આવ્યા હતા, જેનો ઉપયોગ બળવાખોરો દ્વારા કરવામાં આવતો હોવાનું માનવામાં આવે છે.
ઇઝરાયલે રવિવારના હુમલાની પુષ્ટિ કરી ન હતી. ઇરાન સમર્થિત હુથી બળવાખોરો 22 મહિનાથી વધુ સમયથી ઇઝરાયલ પર મિસાઇલો અને ડ્રોન છોડતા આવ્યા છે અને લાલ સમુદ્રમાં જહાજોને નિશાન બનાવતા આવ્યા છે. હુથી બળવાખોરો કહે છે કે તેઓ ગાઝા પટ્ટીમાં યુદ્ધ દરમિયાન પેલેસ્ટિનિયનો સાથે એકતા દર્શાવવા માટે આ હુમલાઓ કરી રહ્યા છે.
ઇઝરાયલી વાયુસેનાના એક અધિકારીએ જણાવ્યું હતું કે શુક્રવારે રાત્રે યમનથી ઇઝરાયલ તરફ છોડવામાં આવેલી ક્લસ્ટર બોમ્બ મિસાઇલ એક નવા ખતરાનો સંકેત હતો. અધિકારીએ જણાવ્યું હતું કે 2023 માં ઇઝરાયલ તરફ રોકેટ છોડવાનું શરૂ કર્યા પછી હુતી બળવાખોરોએ ઇઝરાયલ પર ક્લસ્ટર બોમ્બ છોડ્યા હોય તેવો આ પહેલો પ્રસંગ હતો. અધિકારીએ જણાવ્યું હતું કે ક્લસ્ટર બોમ્બનો ઉપયોગ ઇઝરાયલ માટે તેમને રોકવાનું મુશ્કેલ બનાવે છે.
