ગુજરાતમાં મેઘાની ધમાકેદાર એન્ટ્રી. છેલ્લા ચોવીસ કલાકમાં 226 તાલુકામાં વરસાદ નોંધાયો. જૂનાગઢ અને પોરબંદરમાં 10 ઈંચથી વધુ વરસાદ. હવામાન વિભાગે 11 જિલ્લામાં રેડ એલર્ટ જાહેર કર્યું.
અમદાવાદ, ગુરૂવાર
ગુજરાતમાં ચોમાસાની સિસ્ટમ ફરીથી સક્રિય થતાં રાજ્યના મોટા ભાગના વિસ્તારોમાં વરસાદ પડી રહ્યો છે. ખાસ કરીને દક્ષિણ ગુજરાત અને સૌરાષ્ટ્રના વિસ્તારોમાં હેવી રેઈન નોંધાયો છે. સ્ટેટ ઈમરજન્સી ઓપરેશન સેન્ટર, ગાંધીનગર દ્વારા અપાયેલા આંકડા પ્રમાણે, વીસમી ઓગસ્ટ સવારે છ વાગ્યાથી એકવીસમી ઓગસ્ટ સવારે છ વાગ્યા સુધીના ચોવીસ કલાકમાં ગુજરાતના 226 તાલુકામાં વરસાદ નોંધાયો છે.
જૂનાગઢ અને પોરબંદરમાં 10 ઈંચથી વધુ વરસાદ
સૌથી વધુ વરસાદ જૂનાગઢ અને પોરબંદર જિલ્લામાં નોંધાયો છે. બંને જિલ્લાઓમાં 10 ઈંચથી વધારે વરસાદ પડ્યો છે. જૂનાગઢના મેંદરડામાં સૌથી વધુ 13.31 ઈંચ વરસાદ પડ્યો, જ્યારે કેશોદમાં 11.22 ઈંચ અને વંથલીમાં 10.39 ઈંચ વરસાદ નોંધાયો. આ ઉપરાંત, પોરબંદર તાલુકામાં પણ 10.24 ઈંચ વરસાદ પડ્યો.
રાજ્યના 16 તાલુકામાં પાંચથી દસ ઈંચ વચ્ચે વરસાદ
છેલ્લા ચોવીસ કલાકમાં રાજ્યના 16 તાલુકામાં પાંચ ઈંચથી લઈને દસ ઈંચ વચ્ચે વરસાદ નોંધાયો છે. આ ઉપરાંત, 79 તાલુકા એવા છે જ્યાં એક ઈંચથી પાંચ ઈંચ વચ્ચે વરસાદ પડ્યો છે. કુલ 226 તાલુકામાં હળવાથી અતિ ભારે વરસાદ નોંધાયો છે.
આજે 11 જિલ્લામાં રેડ એલર્ટ
હવામાન વિભાગે આજે, ગુરુવારના દિવસે દક્ષિણ ગુજરાત અને સૌરાષ્ટ્રના 11 જિલ્લાઓમાં ભારેથી અતિ ભારે વરસાદની આગાહી આપી છે. આ જિલ્લાઓમાં સુરત, નવસારી, વલસાડ, દમણ, દાદરા નગર હવેલી, પોરબંદર, દ્વારકા, અમરેલી, ભાવનગર, ગીર સોમનાથ અને દીવનો સમાવેશ થાય છે. આ વિસ્તારોમાં રેડ એલર્ટ જાહેર કરવામાં આવ્યું છે.
