PSI ભરતી 2026: ઉમેદવારો માટે મોટા સમાચાર! ગુજરાત પોલીસ ભરતી બોર્ડ દ્વારા PSI લેખિત પરીક્ષાના કોલલેટર 13 એપ્રિલે ojas.gujarat.gov.in પર જાહેર થશે. 19 એપ્રિલે પરીક્ષા યોજાશે.
ગાંધીનગર, સોમવાર
ગુજરાતમાં પોલીસ સબ ઇન્સ્પેક્ટર બનવાનું સ્વપ્ન જોઇ રહેલા હજારો યુવાનો માટે એક અત્યંત મહત્વપૂર્ણ અપડેટ સામે આવ્યું છે. ગુજરાત પોલીસ ભરતી બોર્ડ (GPRB) દ્વારા PSI કેડરની ભરતી પ્રક્રિયા અંતર્ગત લેખિત પરીક્ષાની તારીખ અને કોલલેટર ડાઉનલોડ કરવાની વિગતો જાહેર કરી દેવામાં આવી છે. જાહેરખબર ક્રમાંક GPRB/202526/1 હેઠળ અરજી કરનાર ઉમેદવારો હવે પોતાની તૈયારીને આખરી ઓપ આપી શકે છે.
ક્યારે અને ક્યાંથી ડાઉનલોડ કરી શકાશે કોલલેટર?
પોલીસ ભરતી બોર્ડની જાહેરાત મુજબ, PSI કેડરના પેપર-1 અને પેપર-2 માટેની લેખિત પરીક્ષાના કોલલેટર 13 એપ્રિલ, 2026 (સોમવાર) ના રોજ બપોરે 2:00 વાગ્યાથી ડાઉનલોડ કરવા માટે ઉપલબ્ધ થશે. તમામ ઉમેદવારોએ બોર્ડની સત્તાવાર વેબસાઇટ ojas.gujarat.gov.in પરથી જ પોતાના કોલલેટર ડાઉનલોડ કરવાના રહેશે.
પરીક્ષા ક્યારે યોજાશે?
બોર્ડ દ્વારા જાહેર કરાયેલ કાર્યક્રમ મુજબ, PSI કેડરની લેખિત પરીક્ષા 19 એપ્રિલ, 2026 (રવિવાર) ના રોજ રાજ્યના વિવિધ કેન્દ્રો પર લેવામાં આવશે. ઉમેદવારોને પોતાના કોલલેટરમાં પરીક્ષા કેન્દ્રનું સરનામું, સમય અને અન્ય જરૂરી સૂચનાઓ મળી રહેશે.
ઉમેદવારો માટે અગત્યની સૂચનાઓ
પરીક્ષાને અનુલક્ષીને બોર્ડ દ્વારા ઉમેદવારો માટે કેટલીક ખાસ સૂચનાઓ જારી કરવામાં આવી છે, જેનું પાલન કરવું ફરજિયાત છે તમામ ઉમેદવારોએ નિયત સમયમર્યાદામાં પોતાનો કોલલેટર ડાઉનલોડ કરી લેવો. કોલલેટર પર આપેલી તમામ સૂચનાઓ અને નિયમોને ધ્યાનપૂર્વક વાંચવા. પરીક્ષાના દિવસે કોલલેટરની પ્રિન્ટઆઉટ કોપી અને એક માન્ય ફોટો આઈડી પ્રૂફ સાથે રાખવું અનિવાર્ય છે. કોલલેટર વગર કોઈપણ ઉમેદવારને પરીક્ષા કેન્દ્રમાં પ્રવેશ આપવામાં આવશે નહીં. પરીક્ષાના દિવસ પહેલાં જ પોતાના પરીક્ષા કેન્દ્રનું સ્થળ ચકાસી લેવાની સલાહ આપવામાં આવે છે.
ભરતી પ્રક્રિયામાં સંપૂર્ણ પારદર્શિતા જાળવવા માટે બોર્ડ કટિબદ્ધ છે. આથી, ઉમેદવારોને અપીલ કરવામાં આવે છે કે તેઓ કોઈપણ પ્રકારની અફવાઓ પર ધ્યાન ન આપે અને માત્ર સત્તાવાર વેબસાઇટ ojas.gujarat.gov.in પર જાહેર થતી માહિતી પર જ વિશ્વાસ રાખે.
