ગુજરાત શાળા સંચાલક મહામંડળે સુરક્ષાના કારણોસર શાળાએ વાહન લઈને આવતા વિદ્યાર્થીઓ માટે વાલીની લેખિત મંજૂરી અને ડ્રાઇવિંગ લાયસન્સ ફરજિયાત બનાવ્યું છે.
ગુજરાતમાં શાળાએ જતા વિદ્યાર્થીઓમાં ટુ-વ્હિલરનો ક્રેઝ સતત વધી રહ્યો છે. વધતા જતા ટ્રાફિક અને સગીર વયના વિદ્યાર્થીઓ સાથે બનતા ગંભીર અકસ્માતોને ધ્યાનમાં રાખીને ‘રાજ્ય શાળા સંચાલક મહામંડળ ટ્રસ્ટ’ દ્વારા એક મહત્વનો નિર્ણય લેવામાં આવ્યો છે. મહામંડળે તમામ ગ્રાન્ટેડ અને સ્વનિર્ભર શાળાઓના સંચાલકોને વિદ્યાર્થીઓની સુરક્ષા માટે કડક સૂચનાઓ આપી છે.
શાળા સંચાલકોની નવી માર્ગદર્શિકા
RTOના વર્તમાન નિયમો મુજબ, ડ્રાઇવિંગ લાયસન્સ ધરાવતા હોય તેવા વિદ્યાર્થીઓ જ વાહન ચલાવી શકે છે. સગીર વયના અને લાયસન્સ વગરના વિદ્યાર્થીઓ વાહન લઈને શાળાએ ન આવે તે સુનિશ્ચિત કરવું એ હવે શાળા સંચાલકોની પ્રાથમિક ફરજ રહેશે.
મહામંડળ દ્વારા સૂચવવામાં આવેલા સુરક્ષાના પગલાં:
-
વાલીની લેખિત મંજૂરી: જે વિદ્યાર્થીઓ વાહન લઈને આવે છે, તેમના વાલી પાસેથી લેખિત અરજી લેવી ફરજિયાત છે.
-
લાયસન્સની નકલ: ડ્રાઇવિંગ લાયસન્સની પ્રમાણિત નકલ મેળવી શાળાના દફતરે (રેકોર્ડ પર) જાળવવી પડશે.
-
સમયબદ્ધ નોંધ: આવા વિદ્યાર્થીઓના શાળામાં આવવા અને છૂટવાના ચોક્કસ સમયની નોંધ રાખવી પડશે અને ત્યારબાદ જ તેમને વાહન સાથે પ્રવેશની મંજૂરી આપવામાં આવશે.
સુરક્ષા શા માટે જરૂરી?
આર્થિક રીતે સધ્ધર પરિવારોના વિદ્યાર્થીઓમાં મોપેડ કે સ્કૂટર લઈને આવવાનો ટ્રેન્ડ વધ્યો છે, પરંતુ ટ્રાફિકના નિયમો અને ડ્રાઇવિંગના અનુભવના અભાવે અકસ્માતોનું જોખમ વધી ગયું છે. મહામંડળના પ્રમુખે કરેલા આ અનુરોધનો મુખ્ય હેતુ વિદ્યાર્થીઓની સુરક્ષા સુનિશ્ચિત કરવાનો અને અકસ્માતોમાં થતા દુઃખદ મોતની ઘટનાઓને રોકવાનો છે.
તમામ શાળા સંચાલકોને આ નિયમોનું ચુસ્તપણે પાલન કરવા અને વિદ્યાર્થીઓના જીવને સુરક્ષિત રાખવા માટે સતર્ક રહેવા જણાવાયું છે.
