બાંગ્લાદેશના પદભ્રષ્ટ પૂર્વ વડાપ્રધાન શેખ હસીનાએ ડિસેમ્બર સુધીમાં સ્વદેશ પરત ફરવાની ઈચ્છા વ્યક્ત કરી છે. જોકે, બાંગ્લાદેશની વચગાળાની સરકારે સ્પષ્ટ કર્યું છે કે, હસીના જેવી બાંગ્લાદેશમાં પ્રવેશ કરશે, તેમની તાત્કાલિક ધરપકડ કરવામાં આવશે.
બાંગ્લાદેશના પદભ્રષ્ટ પૂર્વ વડાપ્રધાન શેખ હસીનાએ ડિસેમ્બર સુધીમાં સ્વદેશ પરત ફરવાની ઈચ્છા વ્યક્ત કરી છે, પરંતુ બાંગ્લાદેશની વચગાળાની સરકારે તેમની વાપસી અંગે અત્યંત કડક વલણ અપનાવ્યું છે.
સરકારની કડક ચેતવણી
બાંગ્લાદેશના કાયદા મંત્રી એમ. અસદુઝમાને સ્પષ્ટ શબ્દોમાં જણાવી દીધું છે કે શેખ હસીના માટે કાયદાકીય માર્ગ સરળ નથી:
સીધી ધરપકડ: મંત્રીના જણાવ્યા અનુસાર, શેખ હસીના જેવી બાંગ્લાદેશની સીમામાં પ્રવેશ કરશે, તેમની તાત્કાલિક ધરપકડ કરવામાં આવશે. તેમને કોર્ટમાં જઈને આત્મસમર્પણ કરવાનો કે કાયદાકીય પ્રક્રિયાનો લાભ લેવાનો કોઈ મોકો આપવામાં આવશે નહીં.
પાસપોર્ટનો મુદ્દો: જ્યારે તેમને પૂછવામાં આવ્યું કે પાસપોર્ટ રદ હોવા છતાં તે કેવી રીતે પરત ફરશે, ત્યારે મંત્રીએ તેને હસીનાની પોતાની સમસ્યા ગણાવીને કહ્યું હતું કે, “તેમણે કેવી રીતે આવવું તે તેમની સમસ્યા છે, પરંતુ જેવી તે અમારા વિસ્તારમાં પ્રવેશશે, અમે કાયદાના અધિકારોનો ઉપયોગ કરીશું.”
શેખ હસીનાનું વલણ
78 વર્ષીય શેખ હસીનાએ એક ઇન્ટરવ્યુમાં જણાવ્યું હતું કે, તેમને પોતાની ધરપકડ, જેલ કે જીવના જોખમ અંગેની સંપૂર્ણ જાણ છે. આમ છતાં, તેમણે કહ્યું છે કે, “મારા લોકો મને બોલાવી રહ્યા છે, તેથી હું પરત જવા માંગુ છું.”
ઐતિહાસિક પૃષ્ઠભૂમિ અને કાયદાકીય સ્થિતિ
ઓગસ્ટ 2024: વિદ્યાર્થીઓના ઉગ્ર વિરોધ પ્રદર્શન બાદ શેખ હસીનાએ સત્તા છોડવી પડી હતી અને ભારતમાં આશરો લીધો હતો.નવેમ્બર 2025: ‘ઇન્ટરનેશનલ ક્રાઈમ ટ્રિબ્યુનલ’ દ્વારા 2024ના આંદોલન દરમિયાન થયેલી હિંસા બદલ તેમને ગેરહાજરીમાં મૃત્યુદંડની સજા સંભળાવવામાં આવી છે. આ કાયદાકીય કાર્યવાહીની નિષ્પક્ષતા પર યુએન હ્યુમન રાઈટ્સ અને એમનેસ્ટી ઈન્ટરનેશનલે સવાલો ઉઠાવ્યા છે.
