વિમ્બલ્ડન ફાઇનલમાં આ સિનરનો પહેલો પ્રવેશ છે અને આ સાથે તે આ સિદ્ધિ હાંસલ કરનાર પ્રથમ ઇટાલિયન પુરુષ ખેલાડી બન્યો
મુંબઈ, શનિવાર : વિમ્બલ્ડન 2025 એ ટેનિસના નવા યુગની શરૂઆત બની રહ્યો છે. 23 વર્ષીય યાનિક સિનરે મહાન ખેલાડી નોવાક જોકોવિચને સીધા સેટમાં હરાવીને ઇતિહાસ રચ્યો અને પ્રથમવાર વિમ્બલ્ડન ફાઈનલમાં પ્રવેશ કર્યો. બીજી તરફ, ડિફેન્ડિંગ ચેમ્પિયન કાર્લોસ અલ્કારાઝે પોતાની અદભૂત ફોર્મ જાળવી રાખીને સતત ત્રીજી વખત ફાઈનલમાં જગ્યા બનાવી. હવે 13 જુલાઈએ સિનર અને અલ્કારાઝ વચ્ચે થનારી ટક્કર ફક્ત ટાઇટલ માટે નહીં, પણ ટેનિસના નવા યુગના આગાજ માટે પણ મહત્વપૂર્ણ રહેશે
વિમ્બલ્ડન ટેનિસ ગ્રાન્ડ સ્લેમ 2025 ની મેન્સ સિંગલ્સની ફાઇનલમાં હવે યાનિક સિનર અને ડિફેન્ડિંગ ચેમ્પિયન કાર્લોસ અલ્કારાઝ રવિવારે સેન્ટર કોર્ટ પર ટાઇટલ ટક્કર માટે ટકરાશે. બંને ખેલાડીઓએ સેમિફાઇનલ મેચમાં પોતાના વિરોધીઓને હરાવીને ફાઇનલમાં સ્થાન મેળવ્યું છે. રવિવાર, 13 જુલાઈના રોજ આ ફાઇનલ ટેનિસના સૌથી રોમાંચક યુગની શરૂઆત કરશે, જ્યાં જોકોવિચ, નડાલ અને ફેડરરના યુગ પછી, અલ્કારાઝ અને સિનર જેવા સ્ટાર્સ હવે ટેનિસ પર પ્રભુત્વ મેળવશે. ઇટાલીના 23 વર્ષીય જેનિક સિનરે સેમિફાઇનલમાં મહાન ખેલાડીઓમાંના એક નોવાક જોકોવિચને 6-3, 6-3, 6-4 થી સીધા સેટમાં હરાવીને ફાઈનલમાં જગ્યા બનાવી લીધી છે. અત્યાર સુધી 24 ગ્રાન્ડ સ્લેમ ટાઇટલ જીતનાર જોકોવિચ સેન્ટર કોર્ટ પર પ્રમાણમાં સંઘર્ષ કરતો જોવા મળ્યો હતો અને સિનરની આક્રમક અને સચોટ રમત સામે લાચાર દેખાતો હતો. વિમ્બલ્ડન ફાઇનલમાં આ સિનરનો પહેલો પ્રવેશ છે અને આ સાથે તે આ સિદ્ધિ હાંસલ કરનાર પ્રથમ ઇટાલિયન પુરુષ ખેલાડી બન્યો છે.
બીજા સેમિફાઇનલમાં, સ્પેનના કાર્લોસ અલ્કારાઝે અમેરિકાના ટેલર ફ્રિટ્ઝને 6-4, 5-7, 6-3, 7-6(6) થી હરાવીને સતત ત્રીજી વખત વિમ્બલ્ડન ફાઇનલમાં પ્રવેશ કર્યો. 22 વર્ષીય અલ્કારાઝ હવે તેના કારકિર્દીના છઠ્ઠા ગ્રાન્ડ સ્લેમ અને સતત ત્રીજા વિમ્બલ્ડન ટાઇટલ જીતવાથી માત્ર એક જીત દૂર છે. અલ્કારાઝ હાલમાં જબરદસ્ત ફોર્મમાં છે અને આ તેની સતત 24મી જીત છે. તેણે 2023 અને 2024 વિમ્બલ્ડન ફાઇનલમાં નોવાક જોકોવિચને હરાવ્યો હતો અને હવે તે તેના અનુભવ અને સેન્ટર કોર્ટના આત્મવિશ્વાસના આધારે ટાઇટલ માટે મજબૂત દાવેદાર છે. ફાઇનલમાં તેનો રેકોર્ડ પણ ઉત્તમ રહ્યો છે, તેણે અત્યાર સુધી રમાયેલી તમામ પાંચ ફાઇનલ જીતી છે.
આ ટુર્નામેન્ટ અમેરિકાના ટેલર ફ્રિટ્ઝ માટે સ્વપ્ન જેવી હતી, પરંતુ અલ્કારાઝ સામે તેની સફર થંભી ગઈ. તે 2009 પછી વિમ્બલ્ડનની ફાઇનલમાં પહોંચનાર પ્રથમ અમેરિકન બનવાનો પ્રયાસ કરી રહ્યો હતો. આ પહેલા, એન્ડી રોડિક રોજર ફેડરર સામે હાર્યા બાદ તે વર્ષે ફાઇનલમાં પહોંચ્યો હતો. તે જ સમયે, નોવાક જોકોવિચની હાર એક યુગના અંતનો સંકેત આપે છે. ઘૂંટણની સર્જરી પછી વાપસી કરી રહેલો જોકોવિચ અનુભવના આધારે આ ટુર્નામેન્ટમાં આગળ વધ્યો હતો, પરંતુ સેમિફાઇનલમાં સિનરની એનર્જી અને સ્પીડ સામે ટકી શક્યો નહીં.
