કલોલના અંબિકા બસ સ્ટેન્ડ પર એક મહિલાના ગળામાંથી રૂ. 94,000ની કિંમતનું સોનાનું મંગળસૂત્ર ચોરાયાની ઘટના સામે આવી છે. ભીડનો લાભ ઉઠાવીને તસ્કરે આ ગુનો આચર્યો હતો, અને પોલીસ આ મામલે વધુ તપાસ કરી રહી છે.
કલોલ, સોમવાર
કલોલ શહેરમાં આવેલા અંબિકા બસ સ્ટેન્ડ પર ચેઇન સ્નેચરો ફરી એકવાર એક્ટિવ થયા છે. તાજેતરમાં, બસમાં ચડતી વખતે ભીડનો લાભ ઉઠાવીને એક મહિલાના ગળામાંથી 94,000 રૂપિયાની કિંમતનું સોનાનું મંગળસૂત્ર ચોરી થયાની ઘટના સામે આવી છે. આ ચોરી અંગે કલોલ શહેર પોલીસે ગુનો નોંધીને તપાસ શરૂ કરી છે.
પોલીસના જણાવ્યા પ્રમાણે, કલોલના ભાગ્યોદય સોસાયટીમાં રહેતા અને એકાઉન્ટન્ટ તરીકે કામ કરતા હેતવીબેન ભટ્ટ 8 ઓગસ્ટના રોજ સવારે લગભગ 10:30 વાગ્યે કલોલ અંબિકા બસ સ્ટેન્ડ પરથી આણંદ જવા માટે બસની રાહ જોઈ રહ્યા હતા. લગભગ 10:45 વાગ્યે અમદાવાદ તરફ જતી બસ આવતાં તેમાં ઘણી ભીડ હતી.
હેતવીબેન ભીડમાં જ બસમાં ચડ્યા, પરંતુ જગ્યા ન મળતાં તેઓ દરવાજા પાસે પગથિયા પર ઊભા રહ્યા. બસ ચાલુ થઈ અને થોડીવાર બાદ કંડક્ટર અને અન્ય મુસાફરોએ બૂમો પાડી કે કોઈએ ચોરી કરી છે. આ સાંભળીને હેતવીબેને પણ પોતાના ગળામાં જોયું તો 1 તોલા સોનાનું મંગળસૂત્ર ગાયબ હતું.
તુરંત તેમણે બૂમો પાડી અને બસ 100 મીટર આગળ બ્રિજ પાસે ઊભી રહી. જોકે, બસમાં અને બસ સ્ટેન્ડ પર ઘણી શોધખોળ કરવા છતાં મંગળસૂત્ર કે ચોરનો કોઈ પત્તો લાગ્યો નહોતો. હેતવીબેને આપેલી ફરિયાદના આધારે, કોઈ અજાણ્યા ઈસમે બસમાં ચડતી વખતે ભીડનો ફાયદો ઉઠાવીને આ ચોરી કરી હોવાનું પોલીસે જણાવ્યું છે. કલોલ શહેર પોલીસે આ મામલે ગુનો નોંધીને વધુ કાર્યવાહી હાથ ધરી છે.
