કર્ણાટકમાં કમલ હાસનની ફિલ્મ ‘ઠગ લાઈફ’ પર લગાવવામાં આવેલા પ્રતિબંધ અંગે સુપ્રીમ કોર્ટે કડક વલણ અપનાવ્યું છે. કોર્ટે કહ્યું કે સિનેમા હોલ સળગાવી દેવાની ધમકીના ડરથી ફિલ્મની રિલીઝ રોકી શકાતી નથી.
નવી દિલ્હી, મંગળવાર: અભિનેતા કમલ હાસનની તાજેતરમાં રિલીઝ થયેલી ફિલ્મ ‘ઠગ લાઈફ’ પર વિવાદ ઉભો થયો છે. કર્ણાટકમાં આ ફિલ્મ પર પ્રતિબંધ મૂકવાની માંગ કરવામાં આવી હતી, ત્યારબાદ ઘણા સિનેમાઘરોમાં તેનું પ્રદર્શન બંધ કરી દેવામાં આવ્યું હતું. હવે સુપ્રીમ કોર્ટે સમગ્ર મામલે રાજ્ય સરકાર અને કર્ણાટક હાઈકોર્ટને સખત ઠપકો આપ્યો છે. મંગળવારે આ કેસની સુનાવણી કરતી વખતે, ન્યાયાધીશ ઉજ્જવલ ભૂયાન અને મનમોહનની બેન્ચે સ્પષ્ટ કર્યું કે ભીડ અને ગુંડા તત્વોને રસ્તાઓ પર કાયદો હાથમાં લેવાની મંજૂરી આપી શકાય નહીં.
‘ફિલ્મને રિલીઝ થતી અટકાવી શકાતી નથી’ – સુપ્રીમ કોર્ટ
બેન્ચે કહ્યું કે જો કોઈ ફિલ્મને સેન્ટ્રલ બોર્ડ ઓફ ફિલ્મ સર્ટિફિકેશન (CBFC) તરફથી પ્રમાણપત્ર મળ્યું હોય, તો તેને રિલીઝ થતી અટકાવી શકાતી નથી. ન્યાયાધીશ મનમોહને કહ્યું, “કાયદાનું શાસન એ માંગ કરે છે કે પ્રમાણિત ફિલ્મ રિલીઝ થાય અને રાજ્ય સરકારે ખાતરી કરવી જોઈએ કે ફિલ્મ પ્રદર્શિત થાય. તમે બંદૂકની અણીએ લોકોને ફિલ્મ ન જોવાનું કહી શકો. સિનેમા હોલ બળી જવાના ડરથી ફિલ્મ બંધ કરવી શક્ય નથી.” તેમણે વધુમાં કહ્યું, “કોઈ ફિલ્મ જોવા માંગે છે કે નહીં, તે તેમની પસંદગી છે. પરંતુ ફિલ્મ રિલીઝ કરવી જરૂરી છે. અમે એવો કોઈ આદેશ નથી આપી રહ્યા કે લોકોએ ફિલ્મ જોવી જ જોઈએ, પરંતુ ફિલ્મનું પ્રદર્શન રોકી શકાય નહીં.”
કોર્ટે કર્ણાટક હાઈકોર્ટ પર પણ નારાજગી વ્યક્ત કરી
કર્ણાટક હાઈકોર્ટે કમલ હાસનને માફી માંગવા કહ્યું તે બાબત પર પણ કોર્ટે વાંધો ઉઠાવ્યો. આના પર જસ્ટિસ મનમોહને તીખો જવાબ આપતા કહ્યું, “એક્ટરને માફી માંગવાનું કહેવું હાઈકોર્ટનું કામ નથી.”
