લોકસભામાં વિપક્ષના નેતા રાહુલ ગાંધી દ્વારા સતત લગાવવામાં આવી રહેલા ‘વોટ ચોરી’ના આરોપો ભારતીય રાજકારણમાં ચર્ચાનો વિષય બન્યા છે.
લોકસભામાં વિપક્ષના નેતા રાહુલ ગાંધી દ્વારા સતત લગાવવામાં આવી રહેલા ‘વોટ ચોરી’ના આરોપો ભારતીય રાજકારણમાં ચર્ચાનો વિષય બન્યા છે. આ મામલે કેન્દ્રીય મંત્રી રામદાસ આઠવલેએ રાહુલ ગાંધીના આક્ષેપોને ખોટા ગણાવીને તેમને નિશાન બનાવ્યા હતા.
આઠવલેએ કહ્યું કે, “વોટ ચોરીના આરોપોમાં કોઈ તથ્ય નથી. જોકે, કેટલીક જગ્યાએ બૉગસ વોટિંગ થાય છે અને મતદાર યાદીમાં કેટલીક ખામીઓ હોય છે. પરંતુ આને ‘વોટ ચોરી’ કહી શકાય નહીં. ચૂંટણી પંચ તેમાં સુધારો કરી રહ્યું છે.”
કેન્દ્રીય મંત્રીએ કૉંગ્રેસની જીતનો હવાલો આપીને રાહુલ ગાંધીના આરોપોને પાયાવિહોણા ગણાવ્યા. તેમણે કહ્યું કે, “લોકસભામાં તેમની (કૉંગ્રેસની) આટલી બેઠકો આવી, ત્યારે અમે ક્યાં કહ્યું કે વોટ ચોરી થઈ છે? જ્યાં અમારી સરકાર આવે છે, ત્યાં તેઓ વોટ ચોરીનો આરોપ લગાવવાનું શરૂ કરે છે. કર્ણાટક અને હિમાચલ પ્રદેશમાં તેમની સરકાર આવી, ત્યારે અમે ક્યાં કહ્યું કે વોટ ચોરી થઈ છે?”
રામદાસ આઠવલેએ રાહુલ ગાંધી પર લોકશાહીને બદનામ કરવાનો આરોપ લગાવ્યો. તેમણે કહ્યું કે રાહુલ ગાંધી ક્યારેક બંધારણ બદલવાના ખોટા આરોપો લગાવે છે અને હવે ‘વોટ ચોરી’નો મુદ્દો લઈને આવ્યા છે. તેમણે સ્પષ્ટ કર્યું કે એવું કંઈ નથી.
નોંધનીય છે કે, કૉંગ્રેસ તરફથી રાહુલ ગાંધી સતત વોટ ચોરીનો આરોપ લગાવી રહ્યા છે, જ્યારે ચૂંટણી પંચે તેમને આ અંગે શપથપત્ર આપવા કે કોર્ટમાં જવા માટે કહ્યું છે, પરંતુ રાહુલ ગાંધીએ તેમ કરવાનો ઇનકાર કરી દીધો છે.
