Weather Alert: ગુજરાતમાં મેઘરાજાનું રૌદ્ર સ્વરૂપ! સાબરકાંઠા સહિત 6 જિલ્લામાં રેડ એલર્ટ અને અન્ય જિલ્લાઓમાં ઓરેન્જ એલર્ટ જાહેર. સરદાર સરોવર ડેમ 65% ભરાયો. જાણો લેટેસ્ટ હવામાન અપડેટ.
અમદાવાદ, સોમવાર
Weather Alert: હાલ દેશભરમાં ચોમાસું જમાવટ કરી રહ્યું છે. ખાસ કરીને ગુજરાત અને મુંબઈમાં વરસાદે રીતસરનો હાહાકાર મચાવ્યો છે. મુંબઈમાં ભારે વરસાદ અને ભૂસ્ખલનની ઘટનાઓને કારણે હાઈવે પર વાહનવ્યવહાર અટકાવી દેવામાં આવ્યો છે, જેનાથી જનજીવન સંપૂર્ણપણે અસ્તવ્યસ્ત થઈ ગયું છે. બીજી તરફ, ઉત્તરાખંડ અને ઉજ્જૈનમાં પણ અતિ ભારે વરસાદ પડતાં નદીઓ ગાંડીતૂર બની છે અને બે કાંઠે વહી રહી છે.
ગુજરાતના 6 જિલ્લામાં રેડ એલર્ટ
હવામાન વિભાગ (IMD) દ્વારા ગુજરાત માટે નવી અને અત્યંત મહત્વની આગાહી કરવામાં આવી છે. બપોરના 1 વાગ્યાથી 4 વાગ્યાના સમયગાળા દરમિયાન રાજ્યના કેટલાક વિસ્તારોમાં મેઘઘર્જના સાથે મુશળધાર વરસાદ ખાબકી શકે છે.
રેડ એલર્ટ (અતિ ભારે વરસાદ): સાબરકાંઠા, અરવલ્લી, ગીર સોમનાથ, અમરેલી, નવસારી અને વલસાડ જિલ્લામાં રેડ એલર્ટ જાહેર કરાયું છે.
ઓરેન્જ એલર્ટ (ભારે વરસાદ): બનાસકાંઠા, મહેસાણા, જૂનાગઢ, રાજકોટ, ભાવનગર, સુરત, તાપી અને ડાંગ જિલ્લામાં ઓરેન્જ એલર્ટ આપવામાં આવ્યું છે.
ગુજરાતની જીવાદોરી સરદાર સરોવર ડેમ 65% છલકાયો
ઉપરવાસમાં પડી રહેલા ધોધમાર વરસાદને કારણે નર્મદા નદીમાં ઘોડાપૂર આવ્યું છે. પરિણામે ગુજરાતની જીવાદોરી સમાન સરદાર સરોવર ડેમમાં હાલ 2.15 લાખ MCFT એટલે કે 65% જેટલો જંગી જળસંગ્રહ થઈ ચૂક્યો છે.
રાજ્યના અન્ય ડેમોની લેટેસ્ટ સ્થિતિની વાત કરીએ તો અન્ય 206 ડેમોમાં 2.09 લાખ MCFT પાણીનો સંગ્રહ થયો છે. 2 ડેમ સંપૂર્ણપણે 100% છલકાઈ ગયા છે. 18 ડેમ 70% થી વધુ અને 20 ડેમ 50% થી વધુ ભરાયા છે. 49 ડેમ 25% થી વધુ, જ્યારે 117 ડેમ હજુ 25% કરતા ઓછા ભરાયેલા છે. પાણીની સપાટી જોતા હાલ 6 ડેમ ‘હાઇ એલર્ટ’, 7 ડેમ ‘એલર્ટ’ અને અન્ય 7 ડેમ ‘વોર્નિંગ લેવલ’ પર મૂકવામાં આવ્યા છે.
બંગાળની ખાડીમાં નવું લો પ્રેશર: 16 રાજ્યોમાં હાઈ એલર્ટ
હવામાન વિભાગના લેટેસ્ટ અપડેટ મુજબ, બંગાળની ખાડીમાં એક નવું ‘લૉ પ્રેશર ઝોન’ સર્જાયું છે. આ સિસ્ટમની અસરથી આગામી 24 કલાકમાં ગુજરાત, મહારાષ્ટ્ર, ઓડિશા અને પશ્ચિમ બંગાળ સહિત દેશના 16 રાજ્યોમાં વાવાઝોડા સાથે ભારે વરસાદ તૂટી પડવાની સંભાવના છે. મુંબઈમાં સ્થિતિ વધુ ન બગડે તે માટે સાવચેતીના ભાગરૂપે શાળા-કોલેજો બંધ કરી દેવામાં આવી છે.
દિલ્હી-યુપીને બફારાથી મળશે રાહત
આગામી 3 થી 4 દિવસમાં ચોમાસું ગુજરાત અને રાજસ્થાનના જે વિસ્તારો બાકી છે, ત્યાં પણ સંપૂર્ણ રીતે પહોંચી જશે. દિલ્હી, ઉત્તર પ્રદેશ અને બિહારના લોકોને ગરમીથી મોટી રાહત મળવાની છે. અહીં 50 થી 60 કિલોમીટર પ્રતિ કલાકની ઝડપે પવન ફૂંકાવાની અને વરસાદ પડવાની આગાહી છે.
દરિયામાં હાલ ભારે કરંટ હોવાથી માછીમારોને આગામી દિવસોમાં ઊંડા દરિયામાં માછલી પકડવા ન જવાની કડક ચેતવણી આપવામાં આવી છે. તંત્ર દ્વારા લોકોને પણ નદી કે નાળા નજીક ન જવા અપીલ કરાઈ છે.
