ન્યૂ સાયન્સ સિટી વિસ્તારમાં આયોજિત જિગરદાન ગઢવીની સાચી નવરાત્રીમાં ભારે હોબાળો થયો હતો. સોમવારે બીજા નોરતે જિગરદાન ગઢવીના ગરબાને પોલીસની મંજૂરી મળી ન હોવાથી રાતે 12 વાગ્યા સુધી ગરબા શરૂ થઈ શક્યા નહોતા. ખેલૈયાઓને ગરબા સ્થળે પ્રવેશ ન અપાતાં ભારે હોબાળો મચ્યો હતો.
પોલીસ મંજૂરીમાં વિલંબ
રવિવારે પહેલા નોરતે સાચી નવરાત્રીના આયોજક સહિત 15 આયોજકોએ ફાયર NOC અને પોલીસની મંજૂરી વગર જ ગરબા યોજી દીધા હતા. આથી તેમને ફાયર બ્રિગેડ તરફથી નોટિસ આપવામાં આવી હતી. સોમવારે જરૂરી ધારાધોરણો પૂરા કર્યા બાદ ફાયર વિભાગે તમામ 15 આયોજકોને મંજૂરી આપી દીધી હતી, પરંતુ જિગરદાન ગઢવીના ગરબાને મોડી રાત સુધી પોલીસની મંજૂરી મળી નહોતી.
ફાયર સેફ્ટીના નિયમોનો ભંગ
જિગરદાન ગઢવીના ગરબા એસી ડોમમાં યોજાવાના હતા. ફાયર બ્રિગેડે 125 ફાયર એક્સટિંગ્વિશર મૂકવાની સૂચના આપી હતી, પરંતુ આયોજકોએ માત્ર 35 જ મૂક્યા હતા. એન્ટ્રી ગેટ પાસે થર્મોકોલનું ડેકોરેશન કરવામાં આવ્યું હતું, જે આગના જોખમને વધારે છે. આ કારણોસર પહેલા દિવસે મંજૂરી અટકાવવામાં આવી હતી.
ફાયર બ્રિગેડે આ અંગે ગાંધીનગરમાં રિપોર્ટ મોકલ્યો હતો અને સરકારે આયોજકો પાસેથી 5 લાખ સુધીનો દંડ વસૂલ કરવાનો અભિપ્રાય આપ્યો હતો.
શહેરમાં ગરબા આયોજન
આ વર્ષે અમદાવાદમાં કુલ 106 જગ્યાએ મોટા ગરબાનું આયોજન થયું છે, જેમાંથી 70 જગ્યાઓ પર નવેનવ દિવસ ગરબા યોજાશે. રવિવાર સુધીમાં 55 અને સોમવારે બાકીના 15 આયોજકોને મંજૂરી મળી ગઈ હતી.
