ભારે વરસાદ અને ભૂસ્ખલનને કારણે માઉન્ટ આબુમાં 3 દિવસ માટે પ્રવાસીઓ પર પ્રતિબંધ મુકવામાં આવ્યો છે. જાણો તંત્ર દ્વારા જારી કરાયેલા 5 મહત્વના આદેશો અને રોડ રિપેરિંગની લેટેસ્ટ અપડેટ.
માઉન્ટ આબુ, મંગળવાર
ભારે વરસાદના કારણે માઉન્ટ આબુ પાસે સાત ગુમ નજીક રોડનો એક મોટો ભાગ ધરાશાયી થઈ ગયો છે. આ ઘટના બાદ સ્થાનિક તંત્રએ તાત્કાલિક કાર્યવાહી કરતા 3 દિવસ માટે પ્રવાસીઓનો પ્રવેશ બંધ કરવાનો નિર્ણય લીધો છે. માઉન્ટ આબુના સબ-ડિવિઝનલ ઓફિસર દ્વારા આ અંગે ઓફિશિયલ આદેશ જારી કરવામાં આવ્યો છે, જેમાં જણાવાયું છે કે જ્યાં સુધી રસ્તાનું રિપેરિંગ કામ પૂર્ણ ન થાય ત્યાં સુધી માઉન્ટ આબુ પ્રવાસીઓ માટે બંધ રહેશે.
આ નિર્ણય બાદ જે ટુરિસ્ટ્સ હાલમાં માઉન્ટ આબુમાં ફસાયેલા છે, તેમને સુરક્ષિત રીતે બહાર કાઢવામાં આવી રહ્યા છે. ડેપ્યુટી-જિલ્લા કલેક્ટર ડૉ. અંશુ પ્રિયાએ પરિસ્થિતિની સમીક્ષા કરવા માટે એક ઇમર્જન્સી મીટિંગ યોજી હતી. આ મીટિંગ બાદ તેમણે જાતે જ રોડના ક્ષતિગ્રસ્ત ભાગનું ઇન્સ્પેક્શન કર્યું. તેમણે પબ્લિક વર્ક્સ ડિપાર્ટમેન્ટના અધિકારીઓને તાત્કાલિક ધોરણે રિપેરિંગ કામગીરી શરૂ કરવા અને ભવિષ્યમાં આવી ઘટનાઓ ન બને તે માટે જરૂરી સાવચેતીના પગલાં લેવાનો આદેશ આપ્યો છે.
ડૉ. અંશુ પ્રિયાએ જણાવ્યું કે વર્તમાન પરિસ્થિતિમાં ટુરિસ્ટ્સને કોઈ પણ પ્રકારની અગવડ ન પડે તે માટે આ પગલું લેવામાં આવ્યું છે. તેમણે ખાતરી આપી કે પરિસ્થિતિ સામાન્ય થતાં જ ટુરિસ્ટ્સનું ફરીથી સ્વાગત કરવામાં આવશે.
તાત્કાલિક 5 આદેશ જાહેર
તંત્ર દ્વારા ટુરિસ્ટ્સ અને સ્થાનિકોની સુરક્ષા માટે પાંચ મહત્વના આદેશો જારી કરવામાં આવ્યા છે, જેનું પાલન કરવું ફરજિયાત છે:
1) આગામી 3 દિવસ સુધી કોઈ પણ ટુરિસ્ટને માઉન્ટ આબુમાં એન્ટ્રી આપવામાં આવશે નહીં.
2) રાત્રે 8:30 થી સવારે 6:00 વાગ્યા સુધી તમામ પ્રકારના વાહનોની અવરજવર પર સંપૂર્ણ રીતે પ્રતિબંધ મુકવામાં આવ્યો છે.
3) હેવી વ્હીકલ્સ, સરકારી અને પ્રાઇવેટ બસો, તેમજ ઓવરલોડ ટ્રક્સને માઉન્ટ આબુ પર આવવા દેવા પર કમ્પ્લીટ બેન છે.
4) જીવન જરૂરિયાતની વસ્તુઓ લઈ જતા નાના વાહનોને માઉન્ટ આબુમાં પ્રવેશની છૂટ આપવામાં આવી છે.
5) હોટેલ માલિકોને આગામી 3 દિવસ માટે પોતાની હોટેલ્સ ખાલી રાખવાનો આદેશ આપવામાં આવ્યો છે.
રોડ રિપેરિંગ કામગીરી યુદ્ધના ધોરણે ચાલુ
માઉન્ટ આબુ પાસે સાત ગુમ પર જે રોડ ડેમેજ થયો છે તેને રિપેર કરવાની કામગીરી યુદ્ધના ધોરણે ચાલી રહી છે. આ કામગીરી પૂરી થયા પછી જ રસ્તો ફરીથી ટુરિસ્ટ્સ માટે ખોલવામાં આવશે. તંત્રએ લોકોને અપીલ કરી છે કે તેઓ આવનારા દિવસોમાં માઉન્ટ આબુની ટ્રાવેલ પ્લાનિંગ ટાળે અને આ પરિસ્થિતિમાં તંત્રને સહકાર આપે. આ નિર્ણય ટુરિસ્ટ્સ અને સ્થાનિક લોકોની સેફ્ટી માટે લેવામાં આવ્યો છે.
