ગાંધીનગરના દહેગામ અને રખિયાલમાં સગીરાઓના અપહરણના બે કિસ્સા સામે આવ્યા છે. લગ્નની લાલચ આપી યુવકો સગીરાઓને ભગાડી ગયા હોવાની ફરિયાદ નોંધાઈ છે. જાણો પોલીસ તપાસની વિગતો આ અહેવાલમાં.
દહેગામ, ગુરૂવાર
ગાંધીનગર જિલ્લામાં કાયદો અને વ્યવસ્થાની સ્થિતિ વચ્ચે સગીરાઓના અપહરણની બે ચોંકાવનારી ઘટનાઓ સામે આવી છે. દહેગામ અને રખિયાલ પોલીસ સ્ટેશન વિસ્તારમાં અલગ-અલગ બનાવોમાં બે સગીરાઓને પ્રેમજાળમાં ફસાવી અને લગ્નની લાલચ આપી ભગાડી જવામાં આવી છે. આ બંને ઘટનાઓને પગલે પંથકમાં ચકચાર મચી ગઈ છે અને દીકરીઓના વાલીઓમાં ચિંતાનું મોજું ફરી વળ્યું છે. હાલ પોલીસે બંને કિસ્સામાં ગુનો નોંધીને આરોપીઓને ઝડપી પાડવા ચક્રો ગતિમાન કર્યા છે.
પહેલી ઘટના દહેગામ પંથકની છે, જ્યાં એક પિતાની ઊંઘ હરામ થઈ ગઈ છે. દહેગામ તાલુકાના એક ગામમાં રહેતા પરિવારની 16 વર્ષીય દીકરી ગત 1 ડિસેમ્બરના રોજ રાત્રે પોતાના ઘરે સૂતી હતી. રાત્રિ દરમિયાન અચાનક તે ગુમ થઈ જતા પરિવારે શોધખોળ હાથ ધરી હતી. તપાસ દરમિયાન જાણવા મળ્યું હતું કે બાજુના ગામ બારોટના મોસમપુરાનો રહેવાસી બાદલજી ખોડાજી ચૌહાણ નામનો યુવક પણ તે જ રાતથી ગાયબ છે. પરિવારને શંકા છે કે આ યુવક તેમની સગીર વયની દીકરીને લગ્ન કરવાની લાલચ આપીને ભગાડી ગયો છે. આ અંગે પિતાએ દહેગામ પોલીસ મથકે ફરિયાદ નોંધાવતા પોલીસે કાયદેસરની કાર્યવાહી હાથ ધરી છે.
બીજો બનાવ રખિયાલના અહેમદપુરા ગામે બન્યો છે, જે વધુ સંવેદનશીલ છે. અહીં સાબરકાંઠાના ઇડરની એક 17 વર્ષીય સગીરા પોતાની ગર્ભવતી બહેનની સારસંભાળ રાખવા માટે આવી હતી. આ સગીરા વડનગર સરકારી પોલીટેકનિક કોલેજમાં બીજા વર્ષમાં અભ્યાસ કરે છે. પોલીસ ફરિયાદ મુજબ, ગત 17 ડિસેમ્બરના રોજ સાંજે 5 વાગ્યાના અરસામાં સાબરકાંઠાના ઇડર તાલુકાના આનંદપુરા ગામનો ભાવેશ દશરથસિંહ ઝાલા નામનો યુવક તેને લલચાવી-ફોસલાવીને ભગાડી ગયો હતો.
આ પ્રેમસંબંધ પાછળની કહાણી પણ પોલીસ તપાસમાં બહાર આવી છે. આશરે 1 વર્ષ પહેલાં સગીરાના દાદાનું અવસાન થયું હતું. તે સમયે આરોપી ભાવેશ ઝાલા ત્યાં મંડપ ડેકોરેશનના કામની મજૂરી અર્થે આવ્યો હતો. આ દરમિયાન બંને એકબીજાના સંપર્કમાં આવ્યા હતા અને પ્રેમસંબંધ બંધાયો હતો. આખરે યુવકે સગીરાને પ્રેમજાળમાં ફસાવી લગ્નની લાલચે તેનું અપહરણ કર્યું હતું. હાલમાં ગાંધીનગર પોલીસે બંને બનાવોને ગંભીરતાથી લઈ અલગ-અલગ ટીમો બનાવી છે અને આરોપીઓને પકડી સગીરાઓને સુરક્ષિત પરત લાવવા તપાસનો ધમધમાટ તેજ કર્યો છે.
