આણંદના આંકલાવમાં મહીસાગર નદી પર રૂ. ૨૧૨ કરોડના ખર્ચે માત્ર ૧૩ મહિનામાં તૈયાર થયેલો નવો ગંભીરા બ્રિજ ૨૦ સપ્ટેમ્બરે મુખ્યમંત્રી ભૂપેન્દ્રભાઈ પટેલના હસ્તે લોકાર્પણ થવા માટે સંપૂર્ણપણે સજ્જ છે.
આણંદ જિલ્લાના આંકલાવ તાલુકામાંથી પસાર થતી મહીસાગર નદી પર અત્યંત ટૂંકા ગાળામાં તૈયાર થયેલા નવનિર્મિત ગંભીરા બ્રિજને લઈને મોટા સમાચાર સામે આવ્યા છે. વર્ષ ૨૦૨૫માં જૂનો બ્રિજ ધરાશાયી થયા બાદ માર્ગ અને મકાન વિભાગ દ્વારા માત્ર ૧૩ મહિનાના રેકોર્ડ સમયમાં આ રૂ. ૨૧૨ કરોડ રૂપિયાના ખર્ચે નવો બ્રિજ બનાવીને તૈયાર કરી દેવામાં આવ્યો છે. આગામી ૨૦ સપ્ટેમ્બરના રોજ રાજ્યના મુખ્યમંત્રી ભૂપેન્દ્રભાઈ પટેલ આ મહત્વકાંક્ષી બ્રિજનું વિધિવત લોકાર્પણ કરશે, જેનાથી હજારો વાહનચાલકો અને સ્થાનિક નાગરિકોને મોટી રાહત મળશે.
સુરક્ષા અને મજબૂતીની કડક ચકાસણી
-
ગુણવત્તાને સર્વોચ્ચ પ્રાથમિકતા: ભૂતકાળમાં બ્રિજ ધરાશાયી થવાની દુર્ઘટનાને ગંભીરતાથી લઈને સરકારે સુરક્ષા અને ટકાઉપણાને સૌથી વધુ પ્રાથમિકતા આપી છે. સિવિલ કામ પૂર્ણ થયા પછી પણ ઉતાવળ કરવાને બદલે બ્રિજની મજબૂતીની સંપૂર્ણ ખાતરી કરવામાં આવી હતી.
-
જટિલ ટેસ્ટિંગ: માર્ગ અને મકાન વિભાગ દ્વારા બ્રિજની મજબૂતી ચકાસવા માટે અલગ-અલગ ત્રણ જટિલ અને કડક ટેસ્ટ સફળતાપૂર્વક પાર પાડવામાં આવ્યા છે, જેથી વાહનવ્યવહાર માટે તે સંપૂર્ણપણે સુરક્ષિત સાબિત થાય.
