ડીસા જી.આઈ.ડી.સી.માં આવેલી ‘પ્રકાશ ગૃહ ઉદ્યોગ’ પેઢી પર ખોરાક અને ઔષધ નિયમન તંત્રે દરોડો પાડી બાળકોના સ્વાસ્થ્યને નુકસાન પહોંચાડતી ખાદ્યચીજોનો મોટો જથ્થો જપ્ત કર્યો છે.
ડીસા શહેરમાં નિર્દોષ નાગરિકો અને ખાસ કરીને માસૂમ બાળકોના આરોગ્ય સાથે ગંભીર ચેડાં કરતી ગેરકાયદે પ્રવૃત્તિઓ સામે ખોરાક અને ઔષધ નિયમન તંત્ર (FDA) દ્વારા કડક કાર્યવાહી હાથ ધરવામાં આવી છે. પાલનપુર વર્તુળ કચેરીની ટીમે ડીસા ખાતે ઓચિંતી તપાસ હાથ ધરીને હાનિકારક પદાર્થોમાંથી તૈયાર થતી અખાદ્ય ચીજવસ્તુઓનો મોટો જથ્થો ઝડપી પાડ્યો છે.
દરોડા અને કાર્યવાહીની મુખ્ય વિગતો
-
અચાનક દરોડો: ડેઝિગ્નેટેડ ઓફિસર ટી.એચ. પટેલના માર્ગદર્શન હેઠળ ફૂડ સેફ્ટી ઓફિસર એમ.એલ. ગુર્જર અને તેમની ટીમ દ્વારા ડીસાના જી.આઈ.ડી.સી. વિસ્તારમાં, પાણીની ટાંકી સામે આવેલી ‘મે. પ્રકાશ ગૃહ ઉદ્યોગ’ નામની પેઢી પર આકસ્મિક તપાસ હાથ ધરવામાં આવી હતી.
-
આરોગ્ય સાથે ચેડાં: તપાસ દરમિયાન પેઢીમાં આરોગ્ય માટે નુકસાનકારક પદાર્થોનો ઉપયોગ કરીને ખાદ્યસામગ્રી બનાવવામાં આવી રહી હોવાનું ધ્યાને આવ્યું હતું, જે ખાસ કરીને બાળકોના સ્વાસ્થ્ય માટે અત્યંત જોખમી સાબિત થઈ શકે છે.
-
જથ્થો સીઝ કરી નમૂના લેવાયા: ફૂડ વિભાગની ટીમે સ્થળ પરથી શંકાસ્પદ ખાદ્યસામગ્રીનો મોટો જથ્થો જપ્ત કર્યો છે અને નિયમ મુજબ નમૂનાઓ એકત્ર કરીને તેને લેબોરેટરી પરીક્ષણ માટે મોકલવાની તજવીજ હાથ ધરી છે. રિપોર્ટ આવ્યા બાદ પેઢી સામે કાયદેસરના કડક પગલાં લેવામાં આવશે.
