સુપ્રીમ કોર્ટે બાકી ઈ-ચલણ વસૂલવા રાજ્યોને કડક કાર્યવાહીનો આદેશ આપ્યો છે. ચલણ ન ભરનારાના RC, ફિટનેસ, PUC અને વાહન ટ્રાન્સફર અટકશે અને વારંવાર નિયમ તોડનારાનું લાઇસન્સ સસ્પેન્ડ થશે.
કેન્દ્રશાસિત પ્રદેશોને સ્પષ્ટ સૂચના આપી છે કે સમયસર ઈ-ચલણ ન ભરનારા વાહનચાલકો સામે જમીની સ્તરે તાત્કાલિક અને કડક કાર્યવાહી કરવામાં આવે. બાકી રકમ ધરાવતા વાહનો જપ્ત કરવાથી લઈને આવા વાહનોની ઓનલાઈન પરિવહન સેવાઓ સ્થગિત કરવા સુધીનો આદેશ અપાયો છે.
RC રિન્યુઅલ, ફિટનેસ અને ‘પરિવહન પોર્ટલ’ પર બ્લેકલિસ્ટિંગ
- ઓનલાઈન સેવાઓ બંધ: દંડની બાકી રકમ સંપૂર્ણ ચૂકવાય નહીં ત્યાં સુધી નોંધણી પ્રમાણપત્ર (RC) રિન્યુઅલ, ડુપ્લિકેટ RC અને સરનામું બદલવાની વિનંતીઓ સ્વીકારાશે નહીં.
- માલિકી ટ્રાન્સફર બંધ: બાકી રકમ ધરાવતા વાહનોને ‘પરિવહન પોર્ટલ’ પર બ્લેકલિસ્ટ કરાશે, જેથી માલિક વાહન બીજાને વેચી કે ટ્રાન્સફર કરી શકશે નહીં.
- ફિટનેસ સર્ટિફિકેટ નહીં: બાકી ઈ-ચલણ ભર્યા વિના વાહનને ફિટનેસ સર્ટિફિકેટ મળી શકશે નહીં.
ડ્રાઇવિંગ લાઇસન્સ અને PUC પર પણ કાર્યવાહી
માત્ર વાહન જ નહીં, ડ્રાઇવર સામે પણ કાર્યવાહી કડક કરાઈ છે. સુપ્રીમ કોર્ટે નોંધ્યું કે વારંવાર ટ્રાફિક નિયમો તોડનારા ડ્રાઇવરોનાં ડ્રાઇવિંગ લાઇસન્સ (DL) તાત્કાલિક સસ્પેન્ડ કરવા જોઈએ અને તેમની લાઇસન્સ રિન્યુઅલ અરજીઓ અટકાવી રાખવી જોઈએ. વધુમાં, દેશનું કોઈ પણ કેન્દ્ર બાકી ચલણ ધરાવતા વાહનો માટે PUC સર્ટિફિકેટ જારી કરી શકશે નહીં.
દેશભરમાં 49,194 કરોડનો દંડ બાકી
સુનાવણીમાં રજૂ થયેલા આંકડા ચોંકાવનારા છે. ‘એમિકસ ક્યુરી’ (ન્યાય મિત્ર)ના અહેવાલ મુજબ કેન્દ્ર સરકાર દ્વારા જારી ઈ-ચલણમાંથી લગભગ 49,194 કરોડ રૂપિયાની રકમ બાકી છે. અત્યાર સુધીમાં માત્ર 26,175 કરોડ રૂપિયા વસૂલ થયા છે, જે દર્શાવે છે કે મોટાભાગના લોકો ચલણની ચુકવણીને ગંભીરતાથી લેતા નથી.
14 વર્ષ જૂની અરજી પર કડક ચેતવણી
આ મામલો 2012માં દાખલ થયેલી જાહેર હિતની અરજી (PIL) સાથે સંબંધિત છે, જેના પર સુપ્રીમ કોર્ટ છેલ્લાં 14 વર્ષથી સુનાવણી અને દેખરેખ કરી રહી છે. કોર્ટે અંતિમ ચેતવણી આપી કે જો મોટર વાહન કાયદાની જોગવાઈઓ માત્ર કાગળ પર રહેશે અને સિસ્ટમ તેનો અમલ કરવામાં નિષ્ફળ જશે, તો કોર્ટ એવા કડક આદેશો આપશે જે સરકારી અધિકારીઓને ભારે પડી શકે.
