ઘટનાની જાણ થતા જ પોલીસ અને SDRFની ટીમો ઘટના સ્થળે પહોંચી ગઈ હતી અને રેસ્ક્યુ ઓપરેશન શરૂ કરી દીધું હતું.
ઉત્તરાખંડ, રવિવાર : ઉત્તરાખંડના રુદ્રપ્રયાગ જિલ્લામાં એક મોટી દુર્ઘટના સામે આવી છે. કેદારનાથ ધામથી ગુપ્તકાશી જઈ રહેલું એક હેલિકોપ્ટર આજે રવિવારે, 15 જૂનના સવારે ગૌરીકુંડના જંગલોમાં ક્રેશ થયું હતું. આ દુર્ઘટનામાં પાયલટ સહિત 6 લોકોના મોત થયા છે, જેમાં ગુજરાતના એક યાત્રીનો પણ સમાવેશ થાય છે.
ઘટનાની વિગતો
આર્યન એવિએશનનું VTBKA/ BELL 407 હેલિકોપ્ટર આજે લગભગ 5:20 વાગ્યે ગૌરીકુંડ નજીક ક્રેશ થયું હતું. આ હેલિકોપ્ટર કેદારનાથથી દર્શન કરીને ગુપ્તકાશી પરત ફરી રહ્યું હતું. હેલિકોપ્ટરમાં પાયલટ ઉપરાંત 5 પુખ્ત વયના લોકો અને 1 બાળક સહિત કુલ 6 યાત્રીઓ સવાર હતા. આ યાત્રીઓ ઉત્તરાખંડ, ઉત્તર પ્રદેશ, મહારાષ્ટ્ર અને ગુજરાતના રહેવાસી હતા.
રેસ્ક્યુ ઓપરેશન અને મુશ્કેલ સ્થિતિ
ઘટનાની જાણ થતા જ પોલીસ અને SDRFની ટીમો ઘટના સ્થળે પહોંચી ગઈ હતી અને રેસ્ક્યુ ઓપરેશન શરૂ કરી દીધું હતું. જોકે, જે સ્થળે આ અકસ્માત થયો છે તે ખૂબ જ દુર્ગમ વિસ્તાર હોવાથી બચાવ કાર્યમાં મુશ્કેલીઓનો સામનો કરવો પડી રહ્યો છે. ઉત્તરાખંડના ADG ડો.વી.મુરુગેસને આ ઘટનાની પુષ્ટિ કરી છે.
મુખ્યમંત્રી પુષ્કર સિંહ ધામીએ વ્યક્ત કર્યો શોક
ઉત્તરાખંડના મુખ્યમંત્રી પુષ્કર સિંહ ધામીએ આ દુર્ઘટના પર ઊંડો શોક વ્યક્ત કર્યો છે. તેમણે X પર ટ્વીટ કરીને જણાવ્યું કે, “રુદ્રપ્રયાગ જિલ્લામાં હેલિકોપ્ટર ક્રેશ થવાના ખૂબ જ દુ:ખદ સમાચાર મળ્યા છે. SDRF, સ્થાનિક પ્રશાસન અને અન્ય બચાવ ટીમો રાહત અને બચાવ કાર્યમાં લાગી છે.”
એક મહિનામાં ત્રીજી દુર્ઘટના
આપને જણાવી દઇએ કે છેલ્લા કેટલાક દિવસોમાં કેદારનાથ નજીક હેલિકોપ્ટર દુર્ઘટનાની આ ત્રીજી ઘટના છે. આ પહેલા 17 મે અને 7 જૂને પણ હેલિકોપ્ટર ક્રેશ થયા હતા. મે મહિનામાં દેહરાદૂનથી ગંગોત્રી ધામ જઈ રહેલું એક હેલિકોપ્ટર ઉત્તરકાશીના ગંગનાની પાસે ક્રેશ થયું હતું, જેમાં 6 લોકોના મોત થયા હતા અને એક ઘાયલ થયો હતો. આ વારંવાર બનતી દુર્ઘટનાઓ હેલિકોપ્ટર સેવાઓની સુરક્ષા પર સવાલો ઉભા કરી રહી છે.
