17 જૂને ઓલ ઈન્ડિયા પીસ એન્ડ સોલિડેરિટી ફાઉન્ડેશન (AIPSF) એ મુંબઈના આઝાદ મેદાનમાં ગાઝાના સમર્થનમાં વિરોધ પ્રદર્શન કરવા માટે પોલીસ પાસે પરવાનગી માંગી હતી.
મુંબઈ, શનિવાર
ગાઝાના સમર્થનમાં પ્રદર્શન કરવાની મંજૂરી ન આપવાના મુંબઈ પોલીસના નિર્ણયને પડકારતી ડાબેરી પક્ષ સીપીઆઈ(એમ)ની અરજીને બોમ્બે હાઈકોર્ટે ફગાવી દીધી છે. આ ચુકાદા દરમિયાન કોર્ટે CPI(M)ને દેશભક્તિ અને સ્થાનિક મુદ્દાઓ પર ધ્યાન કેન્દ્રિત કરવા અંગે મહત્વપૂર્ણ ટિપ્પણીઓ કરી હતી.
ગયા મહિને, 17 જૂને ઓલ ઈન્ડિયા પીસ એન્ડ સોલિડેરિટી ફાઉન્ડેશન (AIPSF) એ મુંબઈના આઝાદ મેદાનમાં ગાઝાના સમર્થનમાં વિરોધ પ્રદર્શન કરવા માટે પોલીસ પાસે પરવાનગી માંગી હતી. જોકે, પોલીસે આ મંજૂરી આપવાનો ઇનકાર કર્યો હતો. આ પછી, CPI(M) એ પોલીસના આ નિર્ણયને બોમ્બે હાઈકોર્ટમાં પડકાર્યો હતો.
આને દેશભક્તિ ન કહેવાય: કોર્ટની આકરી ટિપ્પણી
જસ્ટિસ રવિન્દ્ર વી. ઘુગેની ખંડપીઠે CPI(M)ની અરજી ફગાવતી વખતે સ્પષ્ટ શબ્દોમાં કહ્યું કે, “પહેલા તમારા દેશ તરફ જુઓ, દેશભક્ત બનો. આપણે આને દેશભક્તિ કહી શકીએ નહીં. તમારા દેશના મુદ્દાઓ વિશે વાત કરો.” કોર્ટે એ પણ ભારપૂર્વક જણાવ્યું કે CPI(M) પાસેથી આ મામલે કોઈ પરવાનગી માંગવામાં આવી ન હોવાથી, તેમને આ મુદ્દે દખલ કરવાની કોઈ જરૂર નથી.
દેશના મુદ્દાઓ પર વિરોધ કેમ નહીં?
સુનાવણી દરમિયાન, ન્યાયાધીશ ઘુગેએ CPI(M) જેવા નોંધાયેલા પક્ષોને દેશના સ્થાનિક મુદ્દાઓ પર ધ્યાન કેન્દ્રિત કરવાની સલાહ આપી હતી. તેમણે કહ્યું, CPI(M) ભારતનો એક રજિસ્ટર્ડ પક્ષ છે. તે પ્રદૂષણ, કચરાના પહાડો, પૂર, ગેરકાયદેસર પાર્કિંગ, ડ્રેનેજ જેવા મુદ્દાઓ ઉઠાવી શકે છે. પરંતુ તમે આવા મુદ્દાઓ પર વિરોધ નથી કરી રહ્યા, પરંતુ તમે એવા મુદ્દાઓ વિશે વાત કરી રહ્યા છો જે આપણા દેશથી હજારો માઈલ દૂર અસ્તિત્વમાં છે. આપણે આવા મુદ્દાઓ પર વિરોધ કેમ નથી કરતા?”
CPI(M)ની દલીલ અને કોર્ટનો જવાબ
CPI(M) વતી હાજર રહેલા વકીલ મિહિર દેસાઈએ દલીલ કરી હતી કે મુંબઈ પોલીસે ફક્ત એટલા માટે પરવાનગી આપી નથી કારણ કે તેમને લાગ્યું કે તે દેશની વિદેશ નીતિની વિરુદ્ધ છે. તેમણે ઉમેર્યું કે દેશના દરેક નાગરિકને વિરોધ કરવાનો અધિકાર છે અને જ્યારે સ્થળ પ્રદર્શનો માટે જ નિર્ધારિત હોય, ત્યારે પરવાનગી કેવી રીતે નકારી શકાય.
જોકે, કોર્ટે તેમની દલીલોને ફગાવી દીધી હતી અને સ્થાનિક મુદ્દાઓ પર ધ્યાન કેન્દ્રિત કરવા પર ભાર મૂક્યો હતો.
