આ સમગ્ર મામલે ઉત્રાણ પોલીસ સ્ટેશનમાં ગુનો નોંધીને વધુ કાર્યવાહી હાથ ધરવામાં આવી છે. આ કેસના ખુલાસાથી શેર માર્કેટમાં ગેરકાયદેસર પ્રવૃત્તિઓ પર લગામ કસવામાં મદદ મળશે તેવી આશા છે.
સુરત, બુધવાર
ગુજરાતની સુરત SOG (સ્પેશિયલ ઑપરેશન્સ ગ્રુપ) ટીમે શહેરના વરાછા વિસ્તારમાં એક મોટા શેર માર્કેટ સ્કેમનો પર્દાફાશ કર્યો છે. મેરીડીયન બિઝનેસ સેન્ટરમાં ‘સનરાઈઝ ડેવલપર્સ’ નામની કન્સ્ટ્રક્શન ઑફિસની આડમાં ગેરકાયદેસર શેર માર્કેટ ટ્રેડિંગ અને ગેમિંગનો મોટો નેટવર્ક ખુલ્લો પડ્યો છે. આ કેસમાં પોલીસે 8 આરોપીઓની ધરપકડ કરી જેલમાં મોકલી દીધા છે, જ્યારે અન્ય 2ને વોન્ટેડ જાહેર કરવામાં આવ્યા છે.
કેવી રીતે ચાલતું હતું આ ગેરકાયદેસર ઑપરેશન?
પોલીસ દ્વારા પકડાયેલા આરોપીઓમાં નંદલાલ ગેવડિયા, વિશાલ ગેવડિયા, જયદીપ પીપળિયા, ભાવિન હિરપરા, નવનીત ગેવડિયા, સાહિલ સુવાગિયા, ભાવેશ કીહલા અને બકુલ તરસરિયાનો સમાવેશ થાય છે. આ ઉપરાંત, જાવેદ ઉર્ફે જે.ડી. અને પરિમલ કાપડિયાને વોન્ટેડ ઘોષિત કરવામાં આવ્યા છે.
આરોપીઓ ‘Castilo 9’ અને ‘Stock Grow’ જેવા સ્પેશિયલ સૉફ્ટવેરનો ઉપયોગ કરીને શેર માર્કેટમાં ગેરકાયદેસર ટ્રેડિંગ કરતા હતા. એટલું જ નહીં, તેઓ BET FAIR.COM, NEXON EXCH.COM, PAVANEXCH અને ENGLISH999 જેવી રિસ્ટ્રિક્ટેડ વેબસાઇટ્સ પર ક્રિકેટ, ટેનિસ અને ફૂટબોલ જેવી સ્પોર્ટ્સ ગેમ્સ પર પણ સટ્ટો લગાવતા હતા.
લાખોનો મુદ્દામાલ જપ્ત
પોલીસે આ રેડ દરમિયાન 19 મોબાઇલ ફોન, 4 લેપટોપ, રોકડ રકમ, સિમ કાર્ડ, પાસબુક અને ચેકબુક સહિત કુલ 17.30 લાખનો મુદ્દામાલ જપ્ત કર્યો છે. તપાસમાં સામે આવ્યું છે કે આરોપીઓ શેર માર્કેટ ટ્રેડિંગમાં કરોડો રૂપિયા (લગભગ 943.37 કરોડ) અને બેન્ક અકાઉન્ટ્સ દ્વારા કરોડો રૂપિયા (4.62 કરોડ)ના ટ્રાન્ઝેક્શન કરતા હતા.
આ ગેંગ સોશિયલ મીડિયા પર અટ્રેક્ટિવ એડવર્ટાઇઝમેન્ટ આપીને કસ્ટમર્સને લલચાવતી હતી. તેઓ યુઝર આઈડી અને પાસવર્ડ આપીને લોકોને ગેરકાયદેસર રીતે ઇન્વેસ્ટ કરાવતા હતા, અને આ પૈસા અલગ-અલગ જગ્યાએ ઇન્વેસ્ટ કરવામાં આવતા હતા.
