અમદાવાદના સાઉથ બોપલ વિસ્તારમાં આવેલા અશોક પાન પાર્લર પર SMC એ દરોડો પાડી 1.89 લાખની પ્રતિબંધિત ઈ-સિગારેટ અને મુદ્દામાલ જપ્ત કર્યો છે. દુકાનદારની ધરપકડ, બે સપ્લાયર વોન્ટેડ.
અમદાવાદ, ગુરુવાર
ગુજરાતમાં યુવાધનને બરબાદ કરતા નશાના કાળા કારોબાર સામે પોલીસે સપાટો બોલાવ્યો છે. રાજ્યમાં પ્રતિબંધિત ઈ-સિગારેટ અને વેપિંગ પ્રોડક્ટ્સના ગેરકાયદે વેચાણ વિરુદ્ધ ગાંધીનગર સ્પેશિયલ મોનિટરિંગ સેલ દ્વારા એક મોટી કાર્યવાહી કરવામાં આવી છે. SMC ની ટીમે અમદાવાદ ગ્રામ્યના પોશ ગણાતા સાઉથ બોપલ વિસ્તારમાં આવેલા એક પાન પાર્લર પર દરોડો પાડીને લાખો રૂપિયાનો મુદ્દામાલ જપ્ત કર્યો છે.
અશોક પાન પાર્લરમાં ચાલતો હતો કાળો કારોબાર
પ્રાપ્ત માહિતી અનુસાર, અમદાવાદ ગ્રામ્ય જિલ્લાના બોપલ પોલીસ સ્ટેશનની હદમાં આવતા સાઉથ બોપલ વિસ્તારમાં આવેલા ‘સન સાઉથ પાર્ક’ નામના શોપિંગ સેન્ટરમાં આ દરોડો પાડવામાં આવ્યો હતો. આ શોપિંગ સેન્ટરની દુકાન નંબર 11 માં ‘અશોક પાન પાર્લર’ આવેલું છે. આ પાન પાર્લરની આડમાં પ્રતિબંધિત ઈ-સિગારેટ અને વેપિંગનું ખુલ્લેઆમ વેચાણ થઈ રહ્યું હતું.
પોલીસે શું-શું જપ્ત કર્યું?
SMC ના અધિકારીઓએ દુકાનમાં સર્ચ ઓપરેશન હાથ ધર્યું હતું, જેમાં મોટો જથ્થો મળી આવ્યો હતો. પોલીસે સ્થળ પરથી નીચે મુજબનો મુદ્દામાલ કબજે કર્યો છે. 42 નંગ પ્રતિબંધિત ઈ-સિગારેટ અને વેપિંગ રિફિલ (જેની કિંમત આશરે 1.26 લાખ રૂપિયા છે). 1 મોબાઈલ ફોન, ગેરકાયદેસર વેચાણમાંથી મળેલા 13,540 રૂપિયા રોકડા.પોલીસે દુકાનમાંથી કુલ 1.89 લાખ રૂપિયાનો મુદ્દામાલ જપ્ત કર્યો છે.
એક આરોપીની ધરપકડ, બે સપ્લાયરો વોન્ટેડ
આ ઓપરેશન દરમિયાન પોલીસે પાન પાર્લર ચલાવતા હર્ષિલ પ્રશાંતભાઈ શાહની સ્થળ પરથી જ ધરપકડ કરી લીધી છે. ધરપકડ કર્યા બાદ આગળની કાનૂની કાર્યવાહી માટે આરોપીને બોપલ પોલીસ સ્ટેશનને સોંપવામાં આવ્યો છે.
પોલીસની પ્રાથમિક તપાસમાં સામે આવ્યું છે કે, આ દુકાનમાં ઈ-સિગારેટ સપ્લાય કરવાનું કામ અન્ય બે શખ્સો કરતા હતા. આથી પોલીસે જીવરાજ પાર્ક વિસ્તારમાં રહેતા વિકી મારવાડી અને કાલુપુર વિસ્તારમાં રહેતા તાહીર નામના શખ્સને વોન્ટેડ જાહેર કર્યા છે. તપાસકર્તાઓને પાક્કી શંકા છે કે આ બંને ઈસમો જ યુવાધનને બરબાદ કરતો આ પ્રતિબંધિત માલ દુકાન સુધી પહોંચાડતા હતા.
કડક કાયદાઓ હેઠળ ગુનો દાખલ
હાલમાં પોલીસ દ્વારા આ સમગ્ર મામલે સિગારેટ અને અન્ય તમાકુ ઉત્પાદન અધિનિયમ, 2003 તેમજ ઇલેક્ટ્રોનિક સિગારેટ પ્રતિબંધ અધિનિયમ, 2019ની કડક જોગવાઈઓ હેઠળ ગુનો નોંધવામાં આવ્યો છે. ફરાર આરોપીઓને પકડવા માટે પોલીસે અલગ અલગ દિશામાં તપાસના ચક્રો ગતિમાન કર્યા છે. આવનારા દિવસોમાં આ નેટવર્કમાં જોડાયેલા અન્ય લોકોના નામ પણ ખુલે તેવી પૂરી શક્યતા છે.
