આ કાર્યવાહીથી સ્પષ્ટ થાય છે કે ઉત્તરાયણના ઘણા મહિનાઓ પહેલાં જ ગુજરાતના શહેરોમાં ચાઈનીઝ દોરીનો જથ્થો સંગ્રહ થઈ રહ્યો છે. પોલીસની આ સતર્કતાથી પતંગના તહેવાર દરમિયાન સંભવિત અકસ્માતો અને ઈજાઓ અટકાવવામાં મદદ મળશે.
દહેગામ, રવિવાર
ગાંધીનગર જિલ્લાના દહેગામમાં પ્રતિબંધિત ચાઈનીઝ દોરીનું મોટા પાયે વેચાણ થતું હોવાની આશંકા સાચી ઠરી છે. દહેગામ પોલીસે બે અલગ-અલગ સ્થળોએ દરોડા પાડીને કુલ 4.10 લાખની કિંમતના 1,032 ચાઈનીઝ દોરીના રીલ જપ્ત કર્યા છે. આ કાર્યવાહીથી પતંગ રસિયાઓમાં અને ખાસ કરીને ચાઈનીઝ દોરીના કારણે થતી ઈજાઓને લઈને ચિંતામાં રહેતા લોકોમાં રાહત થઈ છે.
પોલીસ અધિક્ષક રવિતેજા વાસમ શેટ્ટી અને એ.એસ.પી. આયુષ જૈનના સીધા માર્ગદર્શન હેઠળ દહેગામ પી.આઈ. વી.બી. દેસાઈએ આ ઓપરેશન પાર પાડ્યું હતું.
કંથરાઈના છાપરામાંથી 432 રીલ સાથે એક આરોપી ઝડપાયો
દહેગામ પોલીસના ડી-સ્ટાફની ટીમે, જેમાં ઘનશ્યામસિંહ, મોહનભાઈ, સચિનકુમાર, કેતનકુમાર, સોહીલસિંહ, અનિલભાઈ, રાજુભાઈ, વેશીભાઈ અને પિયુષભાઈનો સમાવેશ થાય છે, તેમણે કંથરાઈના છાપરા વિસ્તારમાં એક સફળ રેડ કરી. આ રેડ દરમિયાન, પોલીસે વિશાલ નંદુભાઈ મગનભાઈ દેવીપૂજક નામના આરોપીને 1,72,800ની કિંમતના 432 ચાઈનીઝ દોરીના રીલ સાથે રંગેહાથ ઝડપી પાડ્યો હતો. આ ઘટનાએ બજારમાં ચાઈનીઝ દોરીનો પુરવઠો કઈ રીતે પહોંચી રહ્યો છે તે અંગે ગંભીર સવાલો ઉભા કર્યા છે.
લક્ષ્મીપુરાકંપામાં વધુ 600 રીલ જપ્ત, બે આરોપી વોન્ટેડ
કંથરાઈની સફળતા બાદ, પોલીસે લક્ષ્મીપુરાકંપા વિસ્તારમાં વિજયભાઈ પ્રતાપભાઈ દેવીપૂજક અને ચેતનભાઈ વિજયભાઈ દેવીપૂજકના ઘરે દરોડા પાડ્યા હતા. આ દરોડામાં પોલીસને 2,40,000ની કિંમતના 600 ચાઈનીઝ દોરીના રીલનો મોટો જથ્થો મળ્યો. જોકે, દરોડા સમયે બંને આરોપીઓ ફરાર થઈ ગયા હતા. પોલીસે હવે આ બંને આરોપીઓને વોન્ટેડ જાહેર કરીને તેમને પકડવા માટે શોધખોળ શરૂ કરી છે.
