આ દુર્ઘટનામાં વિમાનમાં સવાર 242 લોકોમાંથી 241ના કરુણ મોત થયા હતા, જ્યારે 40 વર્ષીય વિશ્વાસ કુમાર રમેશનો આશ્ચર્યજનક રીતે બચાવ થયો હતો.
અમદાવાદ, સોમવાર : ગત 12 જૂન, 2025ના રોજ અમદાવાદમાં બનેલી ભીષણ એર ઇન્ડિયા વિમાન દુર્ઘટનામાં એક માત્ર જીવિત બચેલા વિશ્વાસ કુમાર રમેશનો વધુ એક ચોંકાવનારો વીડિયો સામે આવ્યો છે. આ દુર્ઘટનામાં વિમાનમાં સવાર 242 લોકોમાંથી 241ના કરુણ મોત થયા હતા, જ્યારે 40 વર્ષીય વિશ્વાસ કુમાર રમેશનો આશ્ચર્યજનક રીતે બચાવ થયો હતો. વાયરલ થયેલા આ નવા વીડિયોમાં તેઓ પ્લેન ક્રેશ થયા બાદ થયેલા ભયાવહ બ્લાસ્ટ અને આગમાંથી સભાન અવસ્થામાં ચાલતા બહાર આવતા સ્પષ્ટપણે દેખાઈ રહ્યા છે. આ ઘટના ખરેખર કોઈ ચમત્કારથી ઓછી નથી.
શું છે નવા વીડિયોમાં ?
આ નવો વીડિયો દર્શાવે છે કે પ્લેન ક્રેશ થયા બાદ બિલ્ડિંગમાં જાણે ભીષણ દાવાનળ ફાટી નીકળ્યો હોય તેવું ભયાવહ દૃશ્ય છે. આટલા મોટા બ્લાસ્ટ અને આગની લપેટો વચ્ચેથી વિશ્વાસ કુમાર પોતાના પગે ચાલીને બહાર આવી રહ્યા છે. તેમના હાથમાં મોબાઈલ જેવું કંઈક પણ દેખાઈ રહ્યું છે, જે ખરેખર આશ્ચર્યજનક છે. આ વીડિયો સોશિયલ મીડિયા પર ઝડપથી વાયરલ થઈ રહ્યો છે અને લોકો વિશ્વાસ કુમારના અદભૂત બચાવને “મિરેકલ” ગણાવી રહ્યા છે.
વિશ્વાસ કુમારનો અનુભવ
થોડા દિવસો પહેલાં જ્યારે વિશ્વાસ કુમાર રમેશને તેમના બચાવ વિશે પૂછવામાં આવ્યું હતું, ત્યારે તેમણે ભયાવહ અનુભવ વર્ણવ્યો હતો. તેમણે જણાવ્યું હતું કે, “મારી સીટ વિમાનના જે ભાગે હતી તે બિલ્ડિંગ સાથે અથડાયો હશે. ઉપરના ભાગમાં આગ લાગતા ત્યાં લોકો ફસાઈ ગયા, પરંતુ કદાચ હું સીટ સાથે નીચે પડી ગયો. હું કોઈક રીતે બહાર નીકળવામાં સફળ રહ્યો. દરવાજો તૂટેલો હતો અને મેં સામે થોડી ખાલી જગ્યા જોઈ એટલે મેં બહાર નીકળવાનો પ્રયાસ કર્યો. બીજી બાજુ દીવાલ હતી, ત્યાંથી કદાચ કોઈ નીકળી નહીં શક્યું હોય. મારી નજર સામે જ બે એર હોસ્ટેસ, એક કાકા-કાકી અને અન્ય બધું જ બળી રહ્યું હતું.”
આ અકસ્માતમાં વિશ્વાસનો ડાબો હાથ દાઝી ગયો હતો પરંતુ તેમનો જીવ બચી ગયો. તેમણે વધુમાં ઉમેર્યું હતું કે, “હું બહાર નીકળતાની સાથે જ આગ ઝડપથી ફેલાઈ હતી. જો થોડીક સેકન્ડ મોડું થયું હોત તો કદાચ હું પણ કોલસો થઈ ગયો હોત.”
લંડન જતી આ ફ્લાઇટમાં સવાર 242 લોકોમાંથી વિશ્વાસ કુમાર એકમાત્ર મુસાફર છે જે જીવિત બચ્યા છે અને હાલ હોસ્પિટલમાં સારવાર હેઠળ છે. તેમની આ કહાણી ખરેખર અકલ્પનીય છે અને અનેક લોકો માટે આશાનું કિરણ બની છે. આ દુર્ઘટના અંગે વધુ તપાસ ચાલી રહી છે, ત્યારે વિશ્વાસ કુમારનો આ વીડિયો તેમના અદભૂત બચાવનો જીવંત પુરાવો બની રહ્યો છે.
