અમદાવાદના ચંડોળા તળાવની આસપાસના ગેરકાયદે બાંધકામો હટાવ્યા બાદ તળાવ ફરીથી જીવંત બન્યું છે. તેણે તેની જૂની ઓળખ અને આકર્ષણ પાછું મેળવ્યું છે.
અમદાવાદ, રવિવાર
એક સમયે મિનિ બાંગ્લાદેશ તરીકે ઓળખાતા અને ગેરકાયદે દબાણોથી ઘેરાયેલા ચંડોળા તળાવની રોનક પાછી ફરી છે. વર્ષોની ઉપેક્ષા અને સુકાઈ ગયેલી હાલત બાદ, આ ઐતિહાસિક તળાવ હવે પાણીથી છલકાઈ ગયું છે, જે અમદાવાદના લોકો માટે ખુશીના સમાચાર છે. પહેલગામ આતંકી હુમલા બાદ ગુજરાતમાં ગેરકાયદે રહેતા બાંગ્લાદેશીઓને હાંકી કાઢવામાં આવતા, અમદાવાદમાં ચંડોળા વિસ્તારમાં થયેલા દબાણો પણ દૂર કરવામાં આવ્યા હતા. આ કાર્યવાહી બાદ તળાવની આસપાસની જગ્યા ખુલ્લી થઈ અને AMC દ્વારા તળાવની સફાઈનું કામ હાથ ધરવામાં આવ્યું.
ગેરકાયદે બાંધકામો હટાવ્યા બાદ તળાવનો નવો અવતાર
ચંડોળા તળાવની આસપાસ વર્ષોથી ઉભી થયેલી ગેરકાયદે વસાહતોને કારણે તળાવ સુકાઈ ગયું હતું અને તેની પ્રાકૃતિક સુંદરતા ગુમાવી દીધી હતી. તંત્ર દ્વારા આ ગેરકાયદે બાંધકામોને તોડી પાડવામાં આવ્યા અને તળાવની સફાઈ કરવામાં આવી. ચોમાસાની સિઝન જામતા જ, AMC દ્વારા તળાવને ફરીથી ભરવામાં આવ્યું, જેના પરિણામે લાખો લિટર પાણીનો સંગ્રહ થયો છે. ગેરકાયદે દબાણો દૂર થતાં જળસંચયમાં નોંધપાત્ર વધારો થયો છે, જે પર્યાવરણ અને સ્થાનિક જૈવવિવિધતા માટે સકારાત્મક સંકેત છે.
AMCની કામગીરી સફળ, પક્ષીઓનું પુનરાગમન
અમદાવાદના ચંડોળા તળાવની આસપાસના ગેરકાયદે બાંધકામો હટાવ્યા બાદ તળાવ ફરીથી જીવંત બન્યું છે. તેણે તેની જૂની ઓળખ અને આકર્ષણ પાછું મેળવ્યું છે. હાલના ધોધમાર વરસાદને કારણે ચંડોળા તળાવ સંપૂર્ણપણે છલકાઈ ગયું છે. AMC અને સ્થાનિક તંત્ર દ્વારા કરવામાં આવેલી સફાઈ અને જાળવણીની કામગીરી ખરેખર સફળ સાબિત થઈ છે. તળાવમાં પાણી ભરાતાની સાથે જ વિવિધ પ્રકારના પક્ષીઓ પણ પાછા ફર્યા છે, જે આ વિસ્તારની ઇકોલોજીકલ હેલ્થ સુધરી રહી હોવાનો પુરાવો છે. જોકે, તળાવમાં પાણી ઊંડું હોવાથી તંત્ર દ્વારા લોકોની સુરક્ષા માટે ‘આગળ નહીં જવું’ તેવા નોટિસ બોર્ડ પણ લગાવવામાં આવ્યા છે.
