લોકસભામાં વિરોધ પક્ષના નેતા રાહુલ ગાંધી અને ઇન્ડિયા બ્લોકના 10 અન્ય અગ્રણી નેતાઓએ સોમવારે સાંજે સુપ્રીમ કોર્ટમાં ચૂંટણી પંચની સ્પેશિયલ ઇન્ટેન્સિવ રિવિઝન (SIR) પ્રક્રિયા વિરુદ્ધ અરજી દાખલ કરી છે. આ અરજીમાં ચૂંટણી પંચના ડિજિટલ ડેટાબેઝની વિશ્વસનીયતા પર સવાલ ઉઠાવવામાં આવ્યા છે.
અરજીમાં મુખ્ય માંગણીઓ અને આક્ષેપો
અરજીમાં ચૂંટણી પંચના SIR કરવાના નિર્ણયને ગેરકાયદેસર જાહેર કરવાની માંગ કરવામાં આવી છે. સાથે જ સમગ્ર SIR પ્રક્રિયાની કાનૂની માન્યતાની તપાસ કરવાની વિનંતી કરાઈ છે.અરજીમાં પ્રશ્ન ઉઠાવવામાં આવ્યો છે કે શું ચૂંટણી પંચે SIR પ્રક્રિયા દ્વારા તેના હેતુથી આગળ વધીને સત્તાનો ઉપયોગ કર્યો છે. કાનૂની ભાષામાં આને “સત્તાનો છન્ન પ્રયોગ” (Colourable Exercise of Power) કહેવામાં આવે છે.
આ ઉપરાંત અરજીમાં એવા સવાલો પણ ઉઠાવવામાં આવ્યા છે કે:
- શું SIR લાગુ કરતી વખતે ચૂંટણી પંચે કાનૂની પ્રક્રિયાઓનું પાલન કર્યું હતું?
- શું મુખ્ય ચૂંટણી કમિશનરે અન્ય બે ચૂંટણી કમિશનરોની સંમતિ વિના નિર્ણયો લીધા હતા?
વિપક્ષ દ્વારા આ અરજી ચૂંટણી પ્રક્રિયામાં કથિત અનિયમિતતાઓ અને મતદારોના અધિકારોના રક્ષણ માટે દાખલ કરવામાં આવી છે.
