અમિતાભ બચ્ચને પોતાના બ્લોગમાં સ્વાસ્થ્ય અને સર્જરી અંગે ભાવુક પોસ્ટ લખી છે, જેમાં તેમણે જીવનના સંઘર્ષો અને ‘ચેમ્પિયન’ બનીને બહાર આવવાની વાત કરી છે.
બિગ બી એટલે કે અમિતાભ બચ્ચને તાજેતરમાં પોતાના બ્લોગ પર સ્વાસ્થ્ય સંબંધિત એક ખૂબ જ ભાવુક પોસ્ટ લખી છે, જેના કારણે તેમના ચાહકોમાં ચિંતાનું મોજું ફરી વળ્યું છે. તેમણે પોતાના આ બ્લોગમાં હોસ્પિટલ, ICU અને સર્જરીનો સ્પષ્ટ ઉલ્લેખ કરીને પોતાની સ્વાસ્થ્ય સ્થિતિ વિશેના ગહન વિચારો રજૂ કર્યા હતા. અભિનેતાએ હોસ્પિટલમાં ડોક્ટરો અને તબીબી સ્ટાફની દેખરેખ હેઠળ રહીને સર્જરી કરાવવાની પ્રક્રિયા તેમજ ત્યારબાદ ઘરે પરત ફરવાના અનુભવ પર ચર્ચા કરી હતી.
બચ્ચને લખ્યું કે …..
અમિતાભ બચ્ચને પોતાના અનુભવને જીવનનો સૌથી મુશ્કેલ તબક્કો ગણાવતા લખ્યું હતું કે, હોસ્પિટલમાંથી ઘરે પાછા ફરવું એ શારીરિક, માનસિક અને વ્યવહારિક રીતે ખૂબ જ પડકારજનક પ્રક્રિયા છે. તેમણે આ પરિસ્થિતિને એક મોટા સંઘર્ષ તરીકે વર્ણવતા જણાવ્યું હતું કે, જીવનમાં આવી પરિસ્થિતિ સામે કેટલાક લોકો મક્કમ રહીને તેનો સામનો કરે છે અને ‘ચેમ્પિયન’ બનીને બહાર આવે છે, જ્યારે કેટલાક લોકો હાર માની લે છે. તેમણે એ પણ નોંધ્યું હતું કે જેઓ આ પડકારને સ્વીકારવા તૈયાર નથી હોતા, તેઓ ઘણીવાર પોતાના ભૂતકાળના ગૌરવની યાદોમાં જીવતા હોય છે.
બ્લોગ પોસ્ટ કરી
આ બ્લોગ પોસ્ટ દ્વારા અમિતાભ બચ્ચને જીવનના સંઘર્ષ અને તેની સામે લડવાની ક્ષમતા વિશે પોતાના મંતવ્યો વ્યક્ત કર્યા છે. તેમણે પોતાની પોસ્ટના અંતે ચાહકોને સકારાત્મક રહેવાનો સંદેશ આપતા ખૂબ જ પ્રેમપૂર્વક “સ્વસ્થ રહો અને ખુશ રહો” તેવી શુભેચ્છા પાઠવી છે. તેમની આ પોસ્ટ તેમના જીવન પ્રત્યેના સકારાત્મક દ્રષ્ટિકોણને દર્શાવે છે, જોકે તેમના સ્વાસ્થ્યને લઈને ચાહકો હજુ પણ ચિંતિત જણાઈ રહ્યા છે.
