રાજ્યમાં ત્રણ વરસાદી સિસ્ટમ સક્રિય થતાં વલસાડ-નવસારીમાં ઓરેન્જ એલર્ટ અપાયું છે, અને 22 જુલાઈથી સમગ્ર રાજ્યમાં ભારે વરસાદની નવી સિસ્ટમ સક્રિય થશે તેવી આગાહી છે.
ગુજરાતમાં હાલ એકસાથે ત્રણ વરસાદી સિસ્ટમ સક્રિય થતા રાજ્યમાં વરસાદનું જોર ફરી વધવાની હવામાન વિભાગે આગાહી કરી છે. દક્ષિણ-પશ્ચિમ રાજસ્થાનમાં સર્જાયેલું સાયક્લોનિક સર્ક્યુલેશન, મોનસૂન ટ્રફ અને બંગાળની ખાડીમાં બનેલી નવી સિસ્ટમની અસર હેઠળ આગામી દિવસોમાં ગુજરાતના વિવિધ વિસ્તારોમાં ભારેથી અતિ ભારે વરસાદની શક્યતા છે.
હવામાન વિભાગની આગાહી અને એલર્ટ:
ઓરેન્જ એલર્ટ: આજે નવસારી અને વલસાડ જિલ્લામાં અત્યંત ભારે વરસાદની આશંકાને પગલે ‘ઓરેન્જ એલર્ટ’ આપવામાં આવ્યું છે.
યલો એલર્ટ: 21 અને 22 જુલાઈના રોજ દક્ષિણ ગુજરાતના અન્ય ભાગોમાં ‘યલો એલર્ટ’ જાહેર કરવામાં આવ્યું છે.
આગામી તબક્કો:
૨૫ અને ૨૬ જુલાઈ દરમિયાન મધ્ય અને ઉત્તર ગુજરાતમાં વરસાદનું જોર વધશે. ૨૫ જુલાઈએ દાહોદ, પંચમહાલ, છોટાઉદેપુર અને અરવલ્લીમાં, તથા ૨૬ જુલાઈએ સાબરકાંઠા અને મહીસાગર જિલ્લામાં ભારે વરસાદની આગાહી છે. અમદાવાદ અને ગાંધીનગરમાં પણ હળવાથી મધ્યમ વરસાદની અપેક્ષા છે.
અંબાલાલ પટેલની ‘ખતરનાક’ આગાહી:
હવામાન નિષ્ણાત અંબાલાલ પટેલના મતે ૨૨ જુલાઈથી વરસાદની એક નવી અને મજબૂત સિસ્ટમ સક્રિય થશે, જેની અસર સમગ્ર રાજ્યમાં જોવા મળશે:
વ્યાપક વરસાદ: ઉત્તર ગુજરાત, મધ્ય ગુજરાત, સૌરાષ્ટ્ર અને કચ્છના મોટાભાગના વિસ્તારોમાં ભારે વરસાદ પડી શકે છે. સિસ્ટમ વધુ મજબૂત બનતા ૫ થી ૬ ઇંચ સુધીનો વરસાદ પડવાની સંભાવના છે.
દક્ષિણ ગુજરાત: ૨૪ થી ૨૭ જુલાઈ દરમિયાન દક્ષિણ ગુજરાતમાં ૮ થી ૧૦ ઇંચ સુધી વરસાદ વરસી શકે છે, જેનાથી નાની નદીઓમાં પૂર આવવાની શક્યતા છે.
સૌરાષ્ટ્ર: દ્વારકા અને પોરબંદરમાં ૩ ઇંચથી વધુ, જ્યારે ગીર સોમનાથ અને અમરેલીમાં ૪ ઇંચ જેટલો વરસાદ પડી શકે છે. જામનગર, રાજકોટ, સુરેન્દ્રનગર અને મોરબીમાં પણ હળવાથી ભારે વરસાદની આગાહી કરવામાં આવી છે.
