આ મામલે આગળની કાર્યવાહી માટે, બાર એસોસિએશને એક સમિતિની રચના કરી છે. આ સમિતિ સમગ્ર ઘટનાની તપાસ કરશે અને પોતાનો રિપોર્ટ રજૂ કરશે, જેના આધારે કાયદેસરની આગળની કાર્યવાહી કરવામાં આવશે.
મથુરા, શનિવાર
તાજેતરમાં ધાર્મિક કથાકાર અનિરુદ્ધાચાર્ય એક વાયરલ વીડિયોને કારણે વિવાદમાં ઘેરાયા છે, જેમાં તેઓ મહિલાઓ પ્રત્યે અપમાનજનક શબ્દોનો ઉપયોગ કરતા જોવા મળ્યાનો હાવો છે. આ વીડિયો સામે આવ્યા બાદથી તેમનો સતત વિરોધ થઈ રહ્યો છે. આ મામલે મથુરા બાર એસોસિએશન દ્વારા કથાકાર સામે કેસ દાખલ કરવાનો નિર્ણય લેવામાં આવ્યો છે, જ્યારે મહિલા સંગઠનો પણ તેમના નિવેદન સામે આક્રોશ વ્યક્ત કરી રહ્યા છે.
અનિરુદ્ધાચાર્યનો એક ધાર્મિક કાર્યક્રમ દરમિયાનનો વીડિયો સોશિયલ મીડિયા પર ઝડપથી વાયરલ થયો હતો, જેમાં તેઓ સ્ટેજ પરથી મહિલાઓ માટે અપશબ્દોનો પ્રયોગ કરતા જોવા મળ્યા હતા. આ વીડિયો પછીથી તેમને સમાજવાદી પાર્ટીના વડા અખિલેશ યાદવ સાથેના જૂના વીડિયોને કારણે પણ વિવાદોનો સામનો કરવો પડ્યો હતો.
મથુરા બાર એસોસિએશનની કાર્યવાહી
અપરિણીત છોકરીઓ વિરુદ્ધ અનિરુદ્ધાચાર્યના વિવાદાસ્પદ નિવેદનથી લોકોનો ગુસ્સો ફાટી નીકળ્યો છે. આ કિસ્સામાં, મથુરા બાર એસોસિએશને કથાકાર સામે કાયદેસરની કાર્યવાહી કરવાનો નિર્ધાર કર્યો છે. બાર એસોસિએશનના પ્રમુખ પ્રદીપ શર્માએ આ મામલે કેસ લડવાની જવાબદારી લીધી છે.
બાર એસોસિએશનના સચિવ પ્રદીપ લાવાણિયાએ જણાવ્યું કે, મહિલા વકીલ પ્રિયદર્શિની મિશ્રાએ બાર એસોસિએશન કાર્યાલયમાં એક અરજી આપી હતી. આ અરજીમાં કથાકાર દ્વારા અપરિણીત છોકરીઓ વિરુદ્ધ કરવામાં આવેલી ટિપ્પણીનો ઉલ્લેખ કરીને વાંધો ઉઠાવવામાં આવ્યો છે.
મહિલાઓના ન્યાય માટે પ્રતિબદ્ધતા
બાર એસોસિએશનના સચિવે વધુમાં કહ્યું કે, અનિરુદ્ધાચાર્યની ટિપ્પણીથી સમાજની અપરિણીત છોકરીઓ અને મહિલાઓની લાગણીઓને ઊંડી ઠેસ પહોંચી છે. બાર એસોસિએશન આ બાબતને ગંભીરતાથી લઈ રહ્યું છે અને મહિલા વકીલને ન્યાય અપાવવા માટે પ્રતિબદ્ધ છે. તેમણે ભારપૂર્વક જણાવ્યું કે બાર એસોસિએશન હંમેશા મહિલાઓના અધિકારોનું રક્ષણ કરવા તૈયાર છે.
સમિતિની રચના અને આગળની કાર્યવાહી
આ મામલે આગળની કાર્યવાહી માટે, બાર એસોસિએશને એક સમિતિની રચના કરી છે. આ સમિતિ સમગ્ર ઘટનાની તપાસ કરશે અને પોતાનો રિપોર્ટ રજૂ કરશે, જેના આધારે કાયદેસરની આગળની કાર્યવાહી કરવામાં આવશે.
બાર એસોસિએશન ઉપરાંત, અનેક મહિલા સંગઠનો પણ અનિરુદ્ધાચાર્યના નિવેદન અંગે ભારે ગુસ્સામાં છે. આ સંગઠનોએ કથાકાર પાસેથી તેમના નિવેદન માટે માફી માંગણી કરવાની માંગ કરી છે અને જણાવ્યું છે કે તેઓ આ બાબતે ઉગ્ર વિરોધ પ્રદર્શનો પણ કરશે.
કથાકારનો ખુલાસો
આ વિવાદ અંગે, કથાકાર અનિરુદ્ધાચાર્યના ગૌર ગોપાલ આશ્રમના મીડિયા ઇન્ચાર્જ રાહુલે જણાવ્યું કે, મહારાજજીએ આ મામલે પહેલેથી જ એક વીડિયો જાહેર કર્યો છે. તેમાં તેમણે સ્પષ્ટતા કરી છે કે તેમણે આ બધી છોકરીઓ માટે નથી કહ્યું, પરંતુ ફક્ત કેટલીક ચોક્કસ છોકરીઓ માટે જ આ ટિપ્પણી કરી હતી. તેમણે ઉમેર્યું કે, મહારાજજી કોઈની લાગણીઓને ઠેસ પહોંચાડતા નથી અને તેઓ પોતે નારી શક્તિના સેવક છે.
