માઈક્રોસોફ્ટના AI ચીફ મુસ્તફા સુલેમાને ચેતવણી આપી છે કે આગામી 12 થી 18 મહિનામાં AI લાખો વ્હાઈટ કોલર નોકરીઓ છીનવી શકે છે. જાણો તમારી નોકરી કેટલી સુરક્ષિત છે.
અમદાવાદ, મંગળવાર
શું તમે ઓફિસમાં કમ્પ્યુટર સામે બેસીને કામ કરો છો? જો હા, તો આ સમાચાર તમારા માટે ખૂબ જ મહત્વના છે. આર્ટિફિશિયલ ઇન્ટેલિજન્સ (AI) હવે માત્ર એક ચેટબોટ કે ડિજિટલ આસિસ્ટન્ટ પૂરતું સીમિત નથી રહ્યું. તે હવે સીધી તમારી નોકરી પર મોટી અસર કરવા જઈ રહ્યું છે.
વિશ્વની સૌથી મોટી ટેક કંપનીઓમાંની એક માઈક્રોસોફ્ટના AI ચીફ મુસ્તફા સુલેમાને એક ખૂબ જ ચોંકાવનારી ચેતવણી આપી છે. તેમના જણાવ્યા અનુસાર, આગામી 12 થી 18 મહિનામાં લાખો વ્હાઈટ કોલર નોકરીઓ (ઓફિસમાં બેસીને થતા કામ) સંપૂર્ણપણે બદલાઈ જશે અથવા તો AI દ્વારા ઓટોમેટ થઈ જશે.
આ ક્ષેત્રોની નોકરીઓ પર છે સૌથી મોટો ખતરો
સુલેમાને સ્પષ્ટ કર્યું છે કે જે નોકરીઓ કમ્પ્યુટર આધારિત છે, તેના પર સૌથી મોટું જોખમ તોળાઈ રહ્યું છે. ખાસ કરીને નીચે મુજબના ક્ષેત્રોમાં AI માણસોની જગ્યા લઈ શકે છે:
કાયદાકીય કામકાજ (Law)
એકાઉન્ટિંગ (Accounting)
માર્કેટિંગ (Marketing)
પ્રોજેક્ટ મેનેજમેન્ટ (Project Management)
અન્ય કમ્પ્યુટર આધારિત ક્લેરિકલ કામ
AI હવે સહાયક નહિ, આખું કામ જાતે કરશે
અત્યાર સુધી આપણે AI નો ઉપયોગ માત્ર મદદ મેળવવા કરતા હતા. પરંતુ હવે સિસ્ટમ બદલાઈ રહી છે. સુલેમાનના મતે, AI હવે એટલું એડવાન્સ બની ગયું છે કે તે આખું કામ જાતે જ સંભાળી શકે છે. તે ખૂબ જ ઝડપથી ‘હ્યુમન-લેવલ પરફોર્મન્સ’ એટલે કે માણસની જેમ જ વિચારવાની અને કામ કરવાની ક્ષમતા હાંસલ કરી રહ્યું છે. ભવિષ્યમાં પોતાની જરૂરિયાત મુજબ નવું AI મોડલ બનાવવું એટલું સહેલું બની જશે, જેટલું આજે ઇન્ટરનેટ પર કોઈ બ્લોગ લખવો હોય છે.
કંપનીઓ કર્મચારીઓને કાઢીને AI માં રોકાણ કરી રહી છે
આ ચેતવણી માત્ર ડરાવવા માટે નથી અપાઈ, ગ્રાઉન્ડ રિયાલિટી પણ આ જ છે. છેલ્લા કેટલાક મહિનાઓના આંકડાઓ પર નજર કરીએ તો, મેટા (Meta) અને માઈક્રોસોફ્ટ જેવી જાયન્ટ ટેક કંપનીઓએ પોતાના હજારો કર્મચારીઓની છટણી કરી છે. આની સામે આ જ કંપનીઓએ AI ના વિકાસ પાછળ અબજો ડોલરનું રોકાણ વધારી દીધું છે. એન્થ્રોપિક (Anthropic) કંપનીના CEO સહિત અનેક ટેક દિગ્ગજો પણ આ વાત સાથે સહમત છે કે આવનારા વર્ષોમાં AI લાખો વ્હાઈટ કોલર વર્કર્સ માટે સીધો પડકાર બનશે.
ટૂંકમાં કહીએ તો, ટેકનોલોજીની આ નવી ક્રાંતિ હવે આપણા દરવાજે દસ્તક આપી રહી છે. જો આગામી 12 થી 18 મહિનામાં આપણે આપણી સ્કીલ્સને અપગ્રેડ નહીં કરીએ, તો કમ્પ્યુટર પર થતા મોટાભાગના રૂટીન કામ AI મશીનો કરતા જોવા મળશે. આજના સમયમાં એઆઈનો ઉપયોગ કરતા શીખી લેવું જ ભવિષ્યમાં નોકરી બચાવવાનો એકમાત્ર રસ્તો છે.
