ગાંધીનગર ભૂસ્તર તંત્રએ માણસાના અનોડીયા ગામ પાસે સાબરમતી નદીના પટ્ટમાં ગેરકાયદે રેત ખનનના નેટવર્કનો પર્દાફાશ કર્યો છે. 30 લાખની કિંમતના કુલ 13 વાહનો જપ્ત કરીને નિયમોનુસાર કાર્યવાહી હાથ ધરાઈ છે. જાણો આ ઓપરેશનની ડિટેલ્સ.
ગાંધીનગર, રવિવાર
ગાંધીનગર જિલ્લામાં ગેરકાયદેસર રેતી ખનન અને વહનની પ્રવૃત્તિઓ પર લગામ કસવા માટે ભૂસ્તર તંત્ર દ્વારા એક મહત્વપૂર્ણ ઓપરેશન હાથ ધરવામાં આવ્યું છે. કલેકટર મેહુલ દવેની સૂચનાથી કામ કરતા ગાંધીનગર ભૂસ્તર તંત્રએ માણસા તાલુકાના ડોડીપાળ- અનોડીયા ગામ નજીક સાબરમતી નદીના પટ્ટ વિસ્તારમાં પૂર્વ બાતમીના આધારે આકસ્મિક રેડ પાડીને ગેરકાયદેસર રેતી ખનનનું એક મોટું નેટવર્ક ઝડપી પાડ્યું છે.
નદીના પટ્ટ વિસ્તારમાં છેલ્લા ઘણા સમયથી આયોજનબદ્ધ રીતે રેત ખનનની પ્રવૃત્તિઓ માઝા મૂકી રહી હોવાની વ્યાપક બુમરાણ ઉઠી રહી હતી. આ ફરિયાદના આધારે મદદનીશ ભૂસ્તરશાસ્ત્રી પ્રણવ સિંહની આગેવાની હેઠળ ભૂસ્તરવિજ્ઞાન અને ખનિજ ખાતાની ટીમ સક્રિય થઈ હતી.
30 લાખની કિંમતના 13 વાહનો જપ્ત: કાર્યવાહી ચાલુ
ભૂસ્તર તંત્ર દ્વારા પાડવામાં આવેલી આ રેડ દરમિયાન ગેરકાયદે ખનન અને વહનમાં સંડોવાયેલા કુલ 13 વાહનો સ્થળ પરથી સીઝ (Seize) કરવામાં આવ્યા હતા. આ જપ્ત કરાયેલા વાહનોની કિંમત 30 લાખ આંકવામાં આવી છે.
રેડ દરમિયાન જપ્ત કરાયેલા વાહનોની વિગતો:
1 ટ્રેક્ટર (નંબર GJ-18-BS-8633) બકેટ સાથે રેતી લોડિંગ (Loading) કરતું મળી આવ્યું.
3 ટ્રેક્ટર રેતી ભરેલી હાલતમાં મળી આવ્યા.
4 ટ્રેક્ટર ખાલી હાલતમાં મળી આવ્યા.
5 ટ્રેક્ટરની ટ્રોલી ખાલી હાલતમાં મળી આવી.
આ તમામ 13 વાહનોને નિયમોનુસાર સીઝ કરીને ચિલોડા ચેકપોસ્ટ, મોટી શિહોલી, ગાંધીનગર ખાતે રાખવામાં આવ્યા છે.
ભૂસ્તર તંત્ર દ્વારા હાલમાં ગેરકાયદે ખનન કરાયેલા વિસ્તારની માપણી કરવાની કાર્યવાહી હાથ ધરવામાં આવી છે. તેમજ, જપ્ત કરાયેલા વાહનોના માલિકો વિરુદ્ધ ગુજરાત મિનરલ હેઠળ દંડાત્મક કાર્યવાહી પણ ચાલુ છે. આ સફળ ઓપરેશનથી રેત માફિયાઓમાં ફફડાટ વ્યાપી ગયો છે.
