ટ્રમ્પે એવા દેશોને પણ ધમકી આપી છે જેઓ BRICSની નીતિઓને સમર્થન આપે છે, અને કહ્યું છે કે આવા દેશો પર 10% વધારાનો ટૅરિફ લગાવવામાં આવશે.
નવી દિલ્હી, બુધવાર
અમેરિકાના રાષ્ટ્રપતિ ડોનાલ્ડ ટ્રમ્પ અને બ્રાઝિલના રાષ્ટ્રપતિ લુઇઝ ઇનાસિયો લુલા ડી સિલ્વા વચ્ચે ટૅરિફને લઈને તણાવ ચાલી રહ્યો છે. તાજેતરમાં, રાષ્ટ્રપતિ લુલાએ ટ્રમ્પના એક પ્રસ્તાવને સ્પષ્ટપણે નકારી કાઢ્યો છે, જેમાં ટ્રમ્પે ટૅરિફ મુદ્દે વાત કરવા માટે લુલાને ગમે ત્યારે કોલ કરવા કહ્યું હતું.
આ મુદ્દે રાષ્ટ્રપતિ લુલાએ સ્પષ્ટપણે કહ્યું કે તેઓ ટ્રમ્પને કોલ કરવાને બદલે ભારતના વડા પ્રધાન નરેન્દ્ર મોદી અથવા ચીનના રાષ્ટ્રપતિ શી જિનપિંગને કોલ કરવાનું પસંદ કરશે. આ નિવેદન બંને દેશો વચ્ચેના સંબંધોમાં વધતા તણાવને દર્શાવે છે.
અમેરિકાએ બ્રાઝિલ પર 50% ટૅરિફ લગાવ્યો
અમેરિકાએ બ્રાઝિલ પર 50%નો ટૅરિફ લગાવ્યો છે, જેના કારણે બંને દેશો વચ્ચેના સંબંધોમાં કડવાશ આવી છે. આ ટૅરિફના મુદ્દે જ ટ્રમ્પે લુલાને કોલ કરવા કહ્યું હતું, જેનો લુલાએ ઇનકાર કર્યો છે. લુલાએ કહ્યું કે બ્રાઝિલ તેના હિતોનું રક્ષણ કરવા માટે વિશ્વ વ્યાપાર સંગઠન સહિત તમામ ઉપલબ્ધ વિકલ્પોનો ઉપયોગ કરશે.
બ્રાઝિલ BRICS દેશો સાથે સંબંધો મજબૂત કરી રહ્યું છે
રાષ્ટ્રપતિ લુલાએ જણાવ્યું કે તેમની સરકાર BRICS દેશો સહિત અન્ય દેશો સાથે વિદેશી વેપારને મજબૂત કરવા માટે પહેલેથી જ પગલાં ભરી રહી છે. તેમણે કહ્યું કે 2025માં બ્રાઝિલ તેના હિતોના રક્ષણ માટે WTOથી લઈને અન્ય તમામ સંભવિત ઉપાયોનો આશરો લેશે.
નિકી હેલીની ટ્રમ્પને સલાહ
આ સમગ્ર મામલા વચ્ચે, રિપબ્લિકન પાર્ટીના ભારતીય મૂળના નેતા નિકી હેલીએ ડોનાલ્ડ ટ્રમ્પને એક મહત્વની સલાહ આપી છે. હેલીએ ‘X’ (અગાઉનું ટ્વિટર) પર એક પોસ્ટમાં કહ્યું, “ભારતે રશિયા પાસેથી તેલ ન ખરીદવું જોઈએ. પરંતુ ચીન, જે આપણું એક પ્રતિસ્પર્ધી છે અને રશિયન તેમજ ઇરાની તેલનો સૌથી મોટો ખરીદદાર છે, તેને 90 દિવસ માટે ટૅરિફમાં છૂટ આપવામાં આવી છે. ચીનને છૂટ આપશો નહીં અને ભારત જેવા મજબૂત સાથી સાથેના સંબંધો ખરાબ કરશો નહીં.”
