નેતન્યાહૂના આદેશથી ઇઝરાયલી સંરક્ષણ દળ (IDF) એ ગાઝા પટ્ટી પર તાત્કાલિક અને શક્તિશાળી હુમલા શરૂ કરી દીધા છે
ઇઝરાયલ અને હમાસ વચ્ચે ગાઝા પટ્ટી પર થયેલો સંઘર્ષવિરામ (Ceasefire) તૂટતો નજર આવી રહ્યો છે. હમાસ દ્વારા યુદ્ધવિરામ કરારના કથિત ઉલ્લંઘન બાદ ઇઝરાયલના વડાપ્રધાન બેન્જામિન નેતન્યાહૂના આદેશથી ઇઝરાયલી સંરક્ષણ દળ (IDF) એ ગાઝા પટ્ટી પર તાત્કાલિક અને શક્તિશાળી હુમલા શરૂ કરી દીધા છે.
ઇઝરાયલી વિમાનોએ ગાઝા પટ્ટી પર બોમ્બ વરસાવ્યા છે. પ્રત્યક્ષદર્શીઓ અને હમાસના મીડિયા મુજબ, ઉત્તરી ગાઝામાં સૌથી મોટી હોસ્પિટલ, શિફા હોસ્પિટલ (Shifa Hospital) ની નજીકના વિસ્તારને નિશાન બનાવવામાં આવ્યો હતો. રોયટર્સના અહેવાલ પ્રમાણે, આ હુમલાઓમાં ઓછામાં ઓછા બે લોકો માર્યા ગયા છે અને ચાર અન્ય ઘાયલ થયા છે.
આ પહેલાં, દક્ષિણી શહેર રાફા (Rafah) માં ઇઝરાયલી સૈનિકો પર ગોળીબાર કરવામાં આવ્યો હતો, જેના જવાબમાં ઇઝરાયલી દળોએ પણ જવાબી કાર્યવાહી કરી હતી. નેતન્યાહૂએ હમાસ દ્વારા એક બંધકના અવશેષો પરત કરવાના પગલાને યુએસ-મધ્યસ્થી યુદ્ધવિરામ કરારનો સ્પષ્ટ ભંગ ગણાવ્યો છે, જેના કારણે બંને પક્ષો વચ્ચે સતત તણાવ વધી રહ્યો હતો.
