શિક્ષકમાંથી બન્યા શ્રેષ્ઠ દિગ્દર્શક, અરવલ્લી અને દહેગામનું ગૌરવ, દહેગામના શિક્ષક ડૉ. સત્યમ પટેલને હિન્દી શોર્ટ ફિલ્મ Navishta માટે નેશનલ ફિલ્મ ફેમ ફેસ્ટીવલ 2025માં બેસ્ટ ડિરેક્ટરનો એવોર્ડ એનાયત કરાયો. જાણો એક શિક્ષકથી ડિરેક્ટર સુધીની પ્રેરણાદાયક સફર.
દહેગામ, સોમવાર
અરવલ્લી જિલ્લાના બાયડ તાલુકામાં આવેલું એક નાનકડું ગામ એટલે નવી વાસણી. આજે આ ગામ માટે એક અત્યંત ગૌરવની ક્ષણ આવી છે. દહેગામ તાલુકાની વડોદ પ્રાથમિક શાળામાં આસિસ્ટન્ટ શિક્ષક તરીકે ફરજ બજાવતા ડૉ. સત્યમ ગોવિંદભાઈ પટેલે શિક્ષણ જગતની સાથે સાથે ફિલ્મ જગતમાં પણ એક મોટી અને ઐતિહાસિક સિદ્ધિ હાંસલ કરી છે.
નેશનલ ફિલ્મ ફેમ ફેસ્ટીવલ 2025 માં ડંકો વાગ્યો
ગુજરાત યુનિવર્સિટી ખાતે હાલમાં જ નેશનલ ફિલ્મ ફેમ ફેસ્ટીવલ 2025નું ભવ્ય આયોજન કરવામાં આવ્યું હતું. આ પ્રતિષ્ઠિત ફેસ્ટિવલમાં ડૉ. સત્યમ પટેલને તેમની શાનદાર હિન્દી શોર્ટ ફિલ્મ Navishta (નવિસ્તા) માટે બેસ્ટ ડિરેક્ટરના એવોર્ડથી સન્માનિત કરવામાં આવ્યા છે.
આ એવોર્ડ વિતરણ સમારોહ 21 જૂન 2026ના રોજ યોજાયો હતો. જેમાં જાણીતા અને લોકપ્રિય ગુજરાતી અભિનેત્રી પિન્કી પરીખના વરદ હસ્તે ડૉ. સત્યમ પટેલને આ ખાસ સન્માન આપવામાં આવ્યું હતું.
દિગ્ગજ કલાકારોની ખાસ હાજરી
આ શાનદાર અને ઝળહળતા એવોર્ડ સમારોહમાં ગુજરાતી અને ભારતીય સિનેમાના ઘણા જાણીતા ચહેરાઓ હાજર રહ્યા હતા. જેમાં મુખ્યત્વે નીચે મુજબના કલાકારોએ ખાસ હાજરી આપીને કાર્યક્રમની શોભા વધારી હતી:
* ચેતન દૈયા
* મૌલિક ચૌહાણ
* પ્રશાંત બારોટ
* જયેન્દ્ર મહેતા
* દીપક અંતાણી
* યુવરાજ ગઢવી
* ભરત ઠક્કર
* જીતેન્દ્ર ઠક્કર
સફળતાનો શ્રેય ટીમને આપ્યો
આ અવસરે ટીમના ડીઓપી ડિરેક્ટર ઓફ ફોટોગ્રાફી વલય પટેલ, આર્ટ ડિરેક્ટર વિરલ શર્મા, નેરેટર કોમલ શર્મા અને એક્ટર એવા ચિરાયું વ્યાસ પણ જોડાયા હતા. આ શુભપ્રસંગે ડૉ. સત્યમભાઈએ પણ એક સાચા લીડરની જેમ પોતાની આ મોટી સફળતાનો પૂરો શ્રેય તેમની પડદા પાછળ અને પડદા પર કામ કરતી ટીમને આપ્યો છે. તેમજ તેમણે સ્વર્ગસ્થ ડોક્ટર શ્રીમાળી સાહેબને યાદ કરી ભાવપૂર્વક શ્રદ્ધાંજલિ અર્પિત કરી હતી. આ સાથે સહ અભિનેતા એવા મેલાભાઈ પ્રજાપતિને પણ આ પ્રસંગે યાદ કર્યા હતા..
મહત્વનું છે કે, એક સામાન્ય ગામડામાંથી આવતા અને સરકારી શાળામાં શિક્ષક તરીકેની જવાબદારી નિભાવતા નિભાવતા બેસ્ટ ડિરેક્ટર બનવા સુધીની ડૉ. સત્યમ પટેલની આ સફર ખરેખર યુવાનો માટે ખૂબ જ પ્રેરણાદાયક છે. તેમની આ સિદ્ધિ સાબિત કરે છે કે જો તમારામાં ટેલેન્ટ અને કંઈક કરી છૂટવાની ધગશ હોય, તો કોઈપણ ક્ષેત્રમાં સફળતાના શિખરો સર કરી શકાય છે. સમગ્ર ગુજરાત અને ખાસ કરીને શિક્ષણ જગત આજે તેમની આ સિદ્ધિ પર ગર્વ અનુભવી રહ્યું છે.
