દહેગામના એક યુવક સાથે લગ્નના માત્ર 12 દિવસમાં મોટી છેતરપિંડી થઈ. ‘લૂંટેરી દુલ્હન’ પિતાની બીમારીનું બહાનું કાઢીને રૂપિયા 4.35 લાખ રોકડા અને 4 તોલા સોનાના દાગીના લઈને ફરાર થઈ ગઈ. જાણો સમગ્ર ઘટના અને કેવી રીતે ઠગ ટોળકીનો પર્દાફાશ થયો.
દહેગામ, ગુરૂવાર
દહેગામમાં લગ્ન કરવા માગતા એક યુવકના જીવનમાં ખુશીના બદલે આઘાત આવ્યો છે. ઓનલાઇન જીવનસાથીની શોધ તેને એક એવી ‘લૂંટેરી દુલ્હન’ પાસે લઈ ગઈ, જેણે લગ્નના માત્ર 12 દિવસમાં જ લાખો રૂપિયા અને સોનાના દાગીનાનો ચૂનો લગાવી દીધો. આ ઘટનાએ ફરી એકવાર લગ્નના નામે છેતરપિંડી કરતી ટોળકીઓ સક્રિય હોવાની સાબિતી આપી છે.
ઓનલાઇન બાયોડેટા મૂકવો પડ્યો ભારે
દહેગામમાં રહેતા યુવકે લગ્ન માટે પોતાનો બાયોડેટા ઓનલાઇન મેટ્રિમોનિયલ સાઇટ પર મૂક્યો હતો. થોડા સમય બાદ, જ્યોતિ ઉર્ફે જાગૃતિ અને રાજેશ તન્ના નામના બે વચેટિયાઓએ તેનો સંપર્ક કર્યો. તેઓએ યુવકની મુલાકાત ‘ચાંદની’ નામની યુવતી સાથે કરાવી. વાતચીત આગળ વધતાં, છોકરી પક્ષે લગ્નના ખર્ચ પેટે રૂપિયા 3 લાખની માંગણી કરી, જે યુવકના પરિવારે સ્વીકારી લીધી.
ગત 3 ઓક્ટોબરના રોજ અમદાવાદના નવા વાડજ વિસ્તારમાં હિન્દુ વિધિ મુજબ બંનેના લગ્ન ધામધૂમથી થયા. લગ્ન સમયે થયેલી સમજૂતી મુજબ, યુવકના પિતાએ વચેટિયાઓને રૂપિયા 3 લાખ રોકડા ચૂકવી દીધા હતા.
લગ્નના 12 દિવસમાં જ ખેલ ખતમ!
લગ્નજીવનની શરૂઆતના માત્ર 7 દિવસ બાદ જ નવી દુલ્હન ચાંદનીએ પોતાનો અસલી રંગ બતાવવાનું શરૂ કર્યું. તેણે તેના પિતા ગંભીર બીમાર હોવાનું નાટક રચ્યું અને પિયર જવા માટે જીદ કરવા લાગી. પિતાની સારવારના નામે તેણે પતિ પાસેથી વધુ રૂપિયા 1.35 લાખ પડાવી લીધા. 10 ઓક્ટોબરના રોજ, તે પિયર જવા માટે નીકળી. તે સમયે તેણે સાસરીમાંથી મળેલા આશરે 4 તોલા સોનાના દાગીના, જેમાં સોનાનો દોરો, પેન્ડલ અને બ્રેસલેટ સામેલ હતા, તે પણ પહેરી લીધા હતા.
ટીવી પર સમાચાર જોઈને પગ તળેથી જમીન ખસી ગઈ
ચાંદની પિયર ગઈ તેના બે દિવસ બાદ જ તેનો ફોન બંધ આવવા લાગ્યો, જેના કારણે યુવક અને તેના પરિવારને શંકા ગઈ. તેમ છતાં, તેઓ કોઈ પગલું ભરે તે પહેલાં, 15 નવેમ્બરના રોજ એક ચોંકાવનારી ઘટના બની. યુવકે ટીવી પર સમાચાર જોયા કે બહુચરાજી પોલીસે એક ‘લૂંટેરી દુલ્હન’ની ધરપકડ કરી છે, જેણે ઘણા યુવકોને લગ્નના નામે છેતર્યા છે.
ટીવી સ્ક્રીન પર દેખાતી યુવતીને જોતાં જ યુવકના હોશ ઊડી ગયા. તે એ જ ચાંદની હતી, જેની સાથે તેણે લગ્ન કર્યા હતા. આખી ઘટના એક પૂર્વ-આયોજિત કાવતરું હોવાનું સમજાતા, યુવકે તરત જ દહેગામ પોલીસ સ્ટેશનમાં ચાંદની અને તેની ઠગ ટોળકી વિરુદ્ધ છેતરપિંડીની ફરિયાદ નોંધાવી છે. પોલીસે આ મામલે વધુ તપાસ હાથ ધરી છે.
