આ ઘટનાએ બેન્કોમાં ગોલ્ડ વેલ્યુએશન પ્રક્રિયા અને તેની સુરક્ષા પર ગંભીર સવાલો ઉભા કર્યા છે. પોલીસે આ મામલે વધુ તપાસ હાથ ધરી છે અને આરોપીઓની ધરપકડ કરવાની કાર્યવાહી શરૂ કરી છે.
મહેસાણા, મંગળવાર
મહેસાણા જિલ્લાના કડી તાલુકાના મેડા આદરજ ગામમાં આવેલી બેન્ક ઓફ ઇન્ડિયા સાથે 4.54 કરોડથી વધુની ગોલ્ડ લોન છેતરપિંડીનો એક મોટો કિસ્સો સામે આવ્યો છે. આ કૌભાંડમાં ખોટું સોનું ગીરવે મૂકીને લોન મંજૂર કરાવીને બેન્કને છેતરવામાં આવી છે.
શું છે સમગ્ર ઘટના?
પ્રાપ્ત માહિતી અનુસાર, થોળ ગામના મૌલિન દિનેશભાઈ સોની, જે મેડા આદરજ બેન્ક ઓફ ઇન્ડિયામાં અધિકૃત વેલ્યુઅર તરીકે નિમણૂક પામ્યા હતા, તેમણે આ છેતરપિંડીમાં મુખ્ય ભૂમિકા ભજવી છે. આરોપ છે કે મૌલિન સોનીએ ખોટા સોનાનું ગોલ્ડ વેલ્યુએશન સર્ટિફિકેટ બનાવીને લોન મંજૂર કરાવી આપી હતી.
આ છેતરપિંડીમાં મૌલિન દિનેશભાઈ સોની સહિત કુલ 38 લોકો સામેલ હોવાનું બેન્ક દ્વારા જણાવાયું છે. બેન્ક ઓફ ઇન્ડિયાએ આ તમામ 38 આરોપીઓ સામે બાવલુ પોલીસ મથકમાં ફરિયાદ નોંધાવી છે.
કેવી રીતે થઈ છેતરપિંડી?
આરોપીઓએ બેન્કમાં ખોટી સોનાની વસ્તુઓ ગીરવે મૂકી હતી. ત્યારબાદ, અધિકૃત વેલ્યુઅર મૌલિન સોનીએ આ ખોટા સોનાને અસલી તરીકે પ્રમાણિત કરતું સર્ટિફિકેટ બનાવ્યું હતું, જેના આધારે બેન્કે કરોડો રૂપિયાની લોન મંજૂર કરી દીધી હતી. આ રીતે, બેન્કને કુલ 4.54 કરોડથી વધુનો ચૂનો લગાવવામાં આવ્યો છે.
