સાધ્વી પ્રજ્ઞા સિંહ ઠાકુરે આ કેસમાં નિવેદન આપ્યું છે અને તેમણે પોતાને નિર્દોષ જાહેર કરવાને ભગવા રંગનો વિજય ગણાવ્યો છે. સાધ્વી પ્રજ્ઞાએ કહ્યું કે કોર્ટનો આ નિર્ણય ફક્ત મારી જ નહીં પરંતુ ભગવા રંગનો પણ વિજય છે. તેમણે કહ્યું કે આ કેસથી મારું જીવન બરબાદ થઈ ગયું છે.
મુંબઈ, ગુરૂવાર
2008ના માલેગાંવ બ્લાસ્ટ કેસમાં આજે NIA કોર્ટે ઐતિહાસિક ચુકાદો આપ્યો છે. ભાજપના પૂર્વ સાંસદ સાધ્વી પ્રજ્ઞા સિંહ ઠાકુર અને લેફ્ટનન્ટ કર્નલ પ્રસાદ પુરોહિત સહિત તમામ સાત આરોપીઓને નિર્દોષ જાહેર કરવામાં આવ્યા છે. કોર્ટના આ નિર્ણયથી 17 વર્ષ જૂના આ કેસમાં નવો વળાંક આવ્યો છે.
ગવાહો પલટાયા, આરોપીઓ નિર્દોષ
કોર્ટના સૂત્રો દ્વારા મળતી માહિતી મુજબ, કેસના કોઈ પણ ચશ્મદીદ ગવાહ તેમના અગાઉના નિવેદનો પર કાયમ રહ્યા નથી. આ જ કારણોસર કોર્ટે તમામ આરોપીઓને નિર્દોષ છોડી મૂકવાનો નિર્ણય કર્યો છે.
શું હતો માલેગાંવ બ્લાસ્ટ?
29 સપ્ટેમ્બર, 2008ના રોજ મુંબઈથી લગભગ 200 કિલોમીટર દૂર માલેગાંવ ખાતે એક મસ્જિદ નજીક પાર્ક કરેલી મોટરસાઈકલમાં બોમ્બ વિસ્ફોટ થયો હતો. આ ભયાવહ ઘટનામાં છ લોકોના મોત થયા હતા અને 100થી વધુ લોકો ઘાયલ થયા હતા.
કેસની તપાસનો ઇતિહાસ
આ કેસની શરૂઆતની તપાસ મહારાષ્ટ્ર એન્ટી ટેરરિસ્ટ સ્ક્વોડ દ્વારા કરવામાં આવી હતી. ATSનો દાવો હતો કે સાધ્વી પ્રજ્ઞાએ વિસ્ફોટમાં ઉપયોગમાં લેવાયેલું વાહન પૂરું પાડ્યું હતું અને તે તેમના નામે રજિસ્ટર્ડ હતું. ATSએ એવો પણ દાવો કર્યો હતો કે વિસ્ફોટ પહેલા ભોપાલ, ઇન્દોર સહિતના કેટલાક શહેરોમાં કથિત રીતે ઘણી બેઠકો યોજાઈ હતી. જોકે, પાછળથી આ કેસ નેશનલ ઇન્વેસ્ટિગેશન એજન્સીને સોંપવામાં આવ્યો હતો.
આરોપીઓમાં કોણ કોણ સામેલ હતું?
સાધ્વી પ્રજ્ઞા સિંહ ઠાકુર અને લેફ્ટનન્ટ કર્નલ પ્રસાદ પુરોહિત ઉપરાંત, મેજર રમેશ ઉપાધ્યાય, અજય રાહિરકર, સુધાકર દ્વિવેદી, સુધાકર ચતુર્વેદી અને સમીર કુલકર્ણી પર UAPA હેઠળ કેસ ચલાવવામાં આવ્યો હતો.
લાંબી કાનૂની લડાઈનો અંત
આ કેસમાં ટ્રાયલ 2018માં શરૂ થઈ હતી અને 19 એપ્રિલ, 2025ના રોજ પૂરી થઈ. ત્યારબાદ કોર્ટે ચુકાદા માટે કેસને સુરક્ષિત રાખ્યો હતો. આજના ચુકાદા સાથે માલેગાંવ બ્લાસ્ટનો આ હાઈ-પ્રોફાઈલ કેસ હવે સમાપ્ત થયો છે.
