આ ઘટના દર્શાવે છે કે ઑનલાઇન ગેમિંગના વ્યસન અને આર્થિક સંકડામણ કેવી રીતે લોકોને ગુનાહિત પ્રવૃત્તિઓ તરફ ધકેલી શકે છે.
વડોદરા, શનિવાર
વડોદરા ક્રાઈમ બ્રાન્ચે ATM તોડવાનો પ્રયાસ કરનારા ત્રણ આરોપીઓની ધરપકડ કરીને એક મોટા ગુનાનો ભેદ ઉકેલ્યો છે. આરોપીઓએ ઑનલાઇન ગેમમાં મોટી રકમ ગુમાવ્યા બાદ આ ચોરીનો પ્લાન બનાવ્યો હતો.
પ્રાથમિક તપાસ મુજબ, મુખ્ય આરોપી સરફરાજ સૈયદ ઑનલાઇન ‘એવિવેટર’ ગેમમાં આશરે 15 લાખ હારી ગયો હતો. આર્થિક સંકડામણ અને લોનના હપ્તા ચડી જતાં, તેણે ATM તોડી પૈસા મેળવવાનું કાવતરું ઘડ્યું. આ પ્લાનમાં તેના અન્ય બે સાથીદારો, સોહમ માળી અને મનીષ સોલંકી, પણ જોડાયા હતા, જેમને પણ પૈસાની તાત્કાલિક જરૂરિયાત હતી.
ચોરીનો પ્રયાસ અને મોડસ ઑપરેન્ડી
આરોપીઓએ ખાસ કરીને નંદેસરી અને મંજુસર વિસ્તારમાં આવેલા એવા ATMને ટાર્ગેટ કર્યા હતા જ્યાં સિક્યુરિટી ગાર્ડ્સ હાજર નહોતા. ચોરી કરતા પહેલા, તેમણે YouTube પર ATM મશીન કેવી રીતે તોડવું તેના વીડિયો પણ જોયા હતા. વધુમાં, ગત તા. 20મી જૂને, આ ગેંગે કપુરાઈ વિસ્તારમાં એક ગેસ વેલ્ડિંગની દુકાનનું તાળું તોડી, ગેસ કટર અને ગેસ બોટલની ચોરી કરી હતી, જેનો ઉપયોગ ATM તોડવા માટે કરવાનો હતો.
ક્રાઈમ બ્રાન્ચની કાર્યવાહી
વડોદરા ક્રાઈમ બ્રાન્ચે ટેકનિકલ સોર્સિસ અને ગુપ્ત માહિતીના આધારે આ ત્રણેય આરોપીઓને ઝડપી પાડ્યા હતા. તેમની પાસેથી ATM તોડવા માટે ઉપયોગમાં લેવાતા સાધનો સાથેની એક ઇકો કાર પણ મળી આવી છે. પોલીસ પૂછપરછમાં આરોપીઓએ ATM તોડવાનો પ્રયાસ કર્યો હોવાનું કબૂલ્યું છે.
આ ધરપકડથી કપુરાઈ, નંદેસરી અને મંજુસર પોલીસ સ્ટેશનમાં નોંધાયેલા ગુનાઓનો ભેદ પણ ઉકેલાયો છે. ડીસીબી પોલીસે હાલ ત્રણેય આરોપીઓની વધુ પૂછપરછ હાથ ધરી છે, જેથી આ કેસના અન્ય પાસાઓ પણ સ્પષ્ટ થઈ શકે.
