આગામી દિવસોમાં ગુજરાતમાં વરસાદનો જોર યથાવત રહેશે અને ખાસ કરીને સપ્ટેમ્બર મહિનામાં ખેડૂતોએ વિશેષ સાવચેતી રાખવી પડશે.
અમદાવાદ, સોમવાર
ગુજરાતમાં મેઘરાજા ફરી ધડબડાટી બોલાવવા તૈયાર છે! હવામાન નિષ્ણાત અંબાલાલ પટેલે આગામી સમય માટે ચોંકાવનારી આગાહીઓ કરી છે, જેમાં ઓગસ્ટ મહિનામાં સારો વરસાદ અને સપ્ટેમ્બરમાં આફતનો વરસાદ પડવાની શક્યતાઓ વ્યક્ત કરવામાં આવી છે. હાલમાં રાજ્યમાં 4 વરસાદી સિસ્ટમ્સ સક્રિય હોવાથી 29 જુલાઈ સુધી ભારેથી અતિભારે વરસાદની સંભાવના છે.
રાજ્યમાં 4 સિસ્ટમ્સ સક્રિય
હાલ ગુજરાત તરફ એકસાથે 4 વરસાદી સિસ્ટમ્સ સક્રિય થઈ છે – ઓફ શોર ટ્રફ, મોન્સૂન ટ્રફ, સાયક્લોનિક સર્ક્યુલેશન અને લો પ્રેશર સિસ્ટમ. આ સિસ્ટમ્સના કારણે રાજ્યભરમાં વરસાદી માહોલ જામ્યો છે. હવામાન વિભાગે 29 જુલાઈ સુધી રાજ્યના અનેક વિસ્તારોમાં ભારે વરસાદની આગાહી કરી છે.
આજના રેડ અને ઓરેન્જ એલર્ટ
* રેડ એલર્ટ (અત્યંત ભારે વરસાદ): સાબરકાંઠા, અરવલ્લી, મહીસાગર
* ઓરેન્જ એલર્ટ (અતિભારે વરસાદ): બનાસકાંઠા, પાટણ, મહેસાણા, પંચમહાલ, દાહોદ, છોટાઉદેપુર, નર્મદા, નવસારી, વલસાડ, દમણ, દાદરાનગર હવેલી, સુરેન્દ્રનગર.
* યલો એલર્ટ (ભારે વરસાદ): અમદાવાદ, વડોદરા, ખેડા, આણંદ, ભરૂચ, સુરત, ડાંગ, તાપી, કચ્છ, રાજકોટ, ભાવનગર અને બોટાદ.
વલસાડ, નવસારી, દાદરા નગર હવેલી, દમણમાં રેડ એલર્ટ જ્યારે છોટાઉદેપુર, નર્મદા, તાપીમાં પણ રેડ એલર્ટ જાહેર કરાયું છે. અમદાવાદ સહિત 13 જિલ્લામાં ભારે વરસાદની આગાહી છે.
અંબાલાલ પટેલની ઓગસ્ટ અને સપ્ટેમ્બરની ચોંકાવનારી આગાહી
હવામાન નિષ્ણાત અંબાલાલ પટેલે પણ હવામાન વિભાગની આગાહી પર પુષ્ટિ આપી છે અને ઓગસ્ટ-સપ્ટેમ્બર મહિના માટે ખાસ આગાહીઓ કરી છે.
ઓગસ્ટ મહિનાનો વરસાદ: અંબાલાલ પટેલના મતે, બંગાળના ઉપસાગરમાં સર્જાયેલી વરસાદી સિસ્ટમના કારણે ગુજરાતમાં ફરી એકવાર વરસાદી રાઉન્ડ આવશે. મધ્ય ગુજરાત, અમદાવાદ-ગાંધીનગર, મહેસાણા સહિત ઉત્તર ગુજરાતના જિલ્લાઓમાં ભારેથી અતિભારે વરસાદની શક્યતા છે. સૌરાષ્ટ્ર અને દક્ષિણ ગુજરાતમાં પણ સારો વરસાદ આવી શકે છે.
* 6 થી 10 ઓગસ્ટ: રાજ્યમાં સારો વરસાદ
* 18 થી 21 ઓગસ્ટ: ભારેથી અતિભારે વરસાદ
ખેડૂતો માટે ઓગસ્ટ મહિનાનો વરસાદ રાહતરૂપ રહેશે અને તેનું પાણી પાક માટે સારું રહેશે.
સપ્ટેમ્બરમાં આફતનો વરસાદ: સૌથી મહત્વની આગાહી સપ્ટેમ્બર મહિના માટે છે. અંબાલાલ પટેલે 3 સપ્ટેમ્બરના રોજ ભારે વરસાદની આગાહી કરી છે, જેને તેમણે આફતનો વરસાદ ગણાવ્યો છે.
સપ્ટેમ્બર મહિનામાં વરસનાર વરસાદનું પાણી ખેડૂતો માટે નુકસાનકારક હોવાનું અનુમાન છે.
તેમણે ખેડૂતોને સપ્ટેમ્બર મહિના પહેલા જ પાક લઈ લેવાની સૂચના આપી છે.
સપ્ટેમ્બરમાં ખેતરોમાં જીવજંતુ નીકળી શકે તેવી શક્યતા પણ વ્યક્ત કરી, ખેડૂતોને સાવચેત રહેવા જણાવ્યું.
