આ વરસાદ ખેડૂતો માટે આશીર્વાદરૂપ સાબિત થઈ શકે છે, જોકે નીચાણવાળા વિસ્તારોમાં પાણી ભરાવાની સમસ્યાને કારણે લોકોને મુશ્કેલીનો સામનો કરવો પડી રહ્યો છે.
અરવલ્લી, સોમવાર
અરવલ્લી જિલ્લામાં મેઘરાજાની જોરદાર બેટિંગ જોવા મળી રહી છે! રવિવાર રાત્રે ગાજવીજ સાથે શરૂ થયેલા વરસાદએ ભિલોડા પંથકમાં પોતાનો અસલી મિજાજ બતાવ્યો હતો. માત્ર એક જ રાતમાં 6.5 ઈંચ વરસાદ ખાબકતા ભિલોડા અને આસપાસના વિસ્તારોમાં જળબંબાકાર જેવી સ્થિતિ સર્જાઈ હતી. ઠેર-ઠેર પાણી ભરાઈ જવાને કારણે જનજીવન પ્રભાવિત થયું હતું.
ભિલોડા બન્યું જળમગ્ન
સાંજથી શરૂ થયેલા ધોધમાર વરસાદે સવારના 6 વાગ્યા સુધીમાં ભિલોડા તાલુકામાં 167 મિ.મી. (લગભગ 6.5 ઈંચ) વરસાદ નોધાયો હતો. આ અતિભારે વરસાદને કારણે ભિલોડા નગરના નીચાણવાળા વિસ્તારો, જેમ કે શાંતિનગર, માણેકબા સોસાયટી, ગાજણનગર, ગોવિંદનગર, ત્રિભોવનનગર, અને આનંદનગર સોસાયટીમાં પાણી ભરાઈ ગયા હતા. શ્રી લક્ષ્મીનારાયણ મંદિર પાસેના રહેણાક વિસ્તાર અને મુખ્ય ધોરીમાર્ગ પર પણ ઘૂંટણસમા પાણી ભરાઈ ગયા હતા, જેના કારણે લોકોને ભારે મુશ્કેલીનો સામનો કરવો પડ્યો હતો.
ઈડર-શામળાજી ધોરીમાર્ગ પર પણ પાણી ભરાવાના કારણે વાહનવ્યવહાર ધીમો પડ્યો હતો. તાલુકાના ગ્રામ્ય વિસ્તારોમાં પણ ભારે વરસાદ નોંધાયો છે, જેના પરિણામે ઉપરવાસમાં થયેલા વરસાદથી હાથમતી અને બુઢેલી નદીઓમાં પાણીનો પ્રવાહ તેજ બન્યો હતો.
અન્ય તાલુકાઓમાં પણ વરસાદી માહોલ
ભિલોડા ઉપરાંત અરવલ્લી જિલ્લાના અન્ય તાલુકાઓમાં પણ વરસાદ નોંધાયો છે. મોડાસા અને મેઘરજ પંથકમાં એક-એક ઈંચ વરસાદ પડ્યો હતો, જ્યારે બાયડ અને માલપુર પંથકમાં પણ અડધા ઈંચથી વધુ વરસાદ થયો હતો. રાત્રિ દરમિયાન કડાકા-ભડાકા સાથે પડેલા વરસાદે જિલ્લાભરમાં ઠેર-ઠેર પાણી ભરી દીધા હતા.
યલો એલર્ટ જાહેર
હવામાન વિભાગ દ્વારા આગામી ચાર દિવસ સુધી અરવલ્લી જિલ્લા માટે યલો એલર્ટ જાહેર કરવામાં આવ્યું છે. આ એલર્ટ સૂચવે છે કે છૂટાછવાયા વિસ્તારોમાં ભારે વરસાદ પડવાની શક્યતાઓ હજુ પણ છે. તેથી, નાગરિકોને સાવચેત રહેવા અને જરૂરી તકેદારી રાખવા અપીલ કરવામાં આવે છે.
