Gujarat Rain Update: કચ્છમાં મેઘરાજાની ધમાકેદાર બેટિંગ! છેલ્લા 24 કલાકમાં લખપતમાં 6.26 ઇંચ વરસાદ નોંધાયો. જાણો ગુજરાતના કયા વિસ્તારોમાં હવામાન વિભાગે રેડ એલર્ટ જાહેર કર્યું છે અને સંપૂર્ણ વેધર રિપોર્ટ.
અમદાવાદ, મંગળવાર
Gujarat Rain Weather Update: ગુજરાતમાં લાંબા સમયના બ્રેક બાદ ફરી એકવાર મેઘરાજા મહેરબાન થયા છે, અને આ વખતે તેમની સવારી કચ્છ તરફ વળી છે. છેલ્લા 24 કલાકમાં રાજ્યના 67 તાલુકાઓમાં વરસાદ નોંધાયો છે, પરંતુ સૌથી વધુ પ્રભાવ કચ્છ જિલ્લામાં જોવા મળ્યો છે, જ્યાં ભારે વરસાદને કારણે જનજીવન પ્રભાવિત થયું છે.
કચ્છમાં રેકોર્ડબ્રેક વરસાદ, લખપત પાણી-પાણી
સ્ટેટ ઇમરજન્સી ઓપરેશન સેન્ટર (SEOC), ગાંધીનગરના લેટેસ્ટ રિપોર્ટ અનુસાર, 8 સપ્ટેમ્બર 2025 સવારે 6 વાગ્યાથી 9 સપ્ટેમ્બર 2025 સવારે 6 વાગ્યા સુધીના 24 કલાકમાં કચ્છ જિલ્લામાં મેઘરાજાએ રીતસરની ધબધબાટી બોલાવી દીધી છે. જિલ્લાના લખપત તાલુકામાં સૌથી વધુ 6.26 ઇંચ વરસાદ ખાબક્યો છે, જેના કારણે નીચાણવાળા વિસ્તારોમાં પાણી ભરાયા છે. ભારે વરસાદના કારણે પ્રખ્યાત ધોરડોનું સફેદ રણ પણ જાણે દરિયામાં ફેરવાઈ ગયું હોય તેવા દ્રશ્યો સર્જાયા છે.
કચ્છના કયા તાલુકામાં કેટલો વરસાદ? (ઇંચમાં)
રાજ્યના અન્ય વિસ્તારોની સ્થિતિ
છેલ્લા 24 કલાકના વરસાદી આંકડા પર નજર કરીએ તો, રાજ્યના કુલ 19 તાલુકાઓમાં 1 થી 7 ઇંચ સુધીનો નોંધપાત્ર વરસાદ પડ્યો છે. આ તાલુકાઓમાં મુખ્યત્વે કચ્છ, બનાસકાંઠાના વાવ-થરાદ, પાટણ અને મોરબી જિલ્લાના કેટલાક વિસ્તારોનો સમાવેશ થાય છે.
આજે ક્યાં છે વરસાદનું રેડ એલર્ટ?
હવામાન વિભાગ દ્વારા જાહેર કરાયેલી આગાહી મુજબ, આજે મંગળવારે પણ કચ્છ જિલ્લામાં અત્યંત ભારે વરસાદની સંભાવના છે, જેને પગલે રેડ એલર્ટ જાહેર કરવામાં આવ્યું છે. આ ઉપરાંત, ઉત્તર ગુજરાતના બનાસકાંઠા જિલ્લાના વાવ અને થરાદ પંથકમાં પણ ભારેથી અતિ ભારે વરસાદની આગાહી કરવામાં આવી છે. તંત્ર દ્વારા લોકોને સાવચેત રહેવા અપીલ કરવામાં આવી છે.
