ગુજરાત કોમનવેલ્થ ગેમ્સ 2030ની યજમાની માટે સજ્જ થઈ રહ્યું છે. ગાંધીનગરમાં પંચેશ્વરથી કોબા રોડના વિકાસ માટે 157 કરોડ અને સચિવાલયની સુરક્ષા માટે ફેન્સિંગ પ્રોજેક્ટ મંજૂર કરાયા છે. જાણો ગાંધીનગરના વિકાસનો સંપૂર્ણ પ્લાન.
ગાંધીનગર, શનિવાર
ગુજરાતને જ્યારે કોમનવેલ્થ ગેમ્સ 2030ની યજમાની કરવાની તક મળી છે, ત્યારે રાજ્યના પાટનગર ગાંધીનગરે અત્યારથી જ તેની ભવ્ય તૈયારીઓ શરૂ કરી દીધી છે. આંતરરાષ્ટ્રીય કક્ષાની આ ઇવેન્ટ માટે અમદાવાદ અને ગાંધીનગર બંને શહેરોમાં મોટાપાયે ઈન્ફ્રાસ્ટ્રક્ચર અપગ્રેડ કરવામાં આવી રહ્યું છે. આ દિશામાં ગાંધીનગર મહાનગરપાલિકાએ એક મહત્વનો નિર્ણય લેતા શહેરના મુખ્ય માર્ગોને વર્લ્ડ-ક્લાસ બનાવવાની કવાયત હાથ ધરી છે, જેનો સીધો લાભ નાગરિકોને મળશે. સૌથી મોટી અપડેટ એ છે કે પંચેશ્વર સર્કલથી કોબા સર્કલ સુધીના રોડને હવે અત્યાધુનિક સુવિધાઓ સાથે વિકસાવવામાં આવશે. અગાઉ ધોળાકુવા જંક્શનથી પંચેશ્વર સુધીના વિકાસનો નિર્ણય લેવાયો હતો, પરંતુ હવે કોમનવેલ્થ ગેમ્સને ધ્યાનમાં રાખીને ધોળાકુવાથી છેક કોબા સર્કલ સુધીના સમગ્ર પટ્ટાને આઈકોનિક રોડ તરીકે તૈયાર કરવામાં આવશે.
ગાંધીનગર મ્યુનિસિપલ કોર્પોરેશને પંચેશ્વર સર્કલથી કોબા સર્કલ સુધીના આ મહત્વકાંક્ષી પ્રોજેક્ટ માટે ટેન્ડર પ્રક્રિયા હાથ ધરી હતી, જેમાં 149.83 કરોડનો અંદાજિત ખર્ચ નક્કી કરાયો હતો. જોકે, આ કામગીરી માટે 4.70 ટકા ઊંચા ભાવ ભરનારી એજન્સીની પસંદગી કરવામાં આવી છે, જેના કારણે હવે કુલ ખર્ચ 156.86 કરોડની આસપાસ થશે. આ દરખાસ્ત મ્યુનિસિપલ કમિશનર દ્વારા રજૂ કરવામાં આવી છે અને શનિવારે મળનારી સ્થાયી સમિતિની બેઠકમાં તેના પર આખરી મહોર મારવામાં આવશે. આ પ્રોજેક્ટની ગુણવત્તા જળવાઈ રહે તે માટે કન્સલ્ટન્ટ એજન્સીને પ્રોજેક્ટ કોસ્ટના 1.50 ટકા રકમ ચૂકવવામાં આવશે. આ રોડ માત્ર ડામરનો રસ્તો નહીં હોય, પરંતુ તેમાં સ્માર્ટ ટેકનોલોજી અને આધુનિક સુવિધાઓનો સમન્વય હશે જે વિદેશી મહેમાનોને પણ પ્રભાવિત કરશે.
શહેરની સુંદરતાની સાથે સુરક્ષા વ્યવસ્થાને પણ એટલું જ મહત્વ આપવામાં આવ્યું છે. રાજ્યનું વહીવટી કેન્દ્ર જ્યાં આવેલું છે તેવા સચિવાલય સંકુલની સુરક્ષા વધુ સઘન બનાવવા માટે ગેટ નંબર 2થી ‘જ’ રોડ સુધી કમ્પાઉન્ડ વોલ અને તાર ફેન્સિંગ કરવામાં આવશે. ઉલ્લેખનીય છે કે, સચિવાલયનો ગેટ નંબર 2 માત્ર મુખ્યમંત્રી અને મંત્રીઓ માટે જ ખુલ્લો હોય છે અને વડાપ્રધાન સહિતના વીવીઆઈપી મહેમાનો હેલિપેડથી રાજભવન જવા માટે આ રૂટનો ઉપયોગ કરતા હોય છે. આ વિસ્તારમાં જંગલ હોવાથી વન્ય પ્રાણીઓની અવરજવર પણ રહેતી હોય છે, તેથી સુરક્ષા અને સલામતી બંને હેતુસર આ નિર્ણય લેવાયો છે. આ કામગીરી માટે 2.32 કરોડના અંદાજ સામે 35 ટકા નીચા ભાવે, એટલે કે 1.50 કરોડમાં કામગીરી સોંપવામાં આવશે.
વિકાસની આ હરણફાળમાં ‘ન્યૂ ગાંધીનગર’ વિસ્તારને પણ આવરી લેવાયો છે. કુડાસણ, રાયસણ, રાંદેસણ, સરગાસણ, કોબા, નભોઈ, પોર અને અંબાપુર જેવા વિકસતા ટીપી વિસ્તારોમાં નવા રોડ અને રીસરફેસિંગ માટે 73 કરોડનો ખર્ચ કરવામાં આવશે. આ ઉપરાંત પાલજ અને બાસણમાં આરસીસી રોડ માટે 4.30 કરોડ મંજૂર કરવામાં આવશે. આમ, કુલ મળીને ન્યૂ ગાંધીનગરના રસ્તાઓ માટે 77 કરોડથી વધુનું બજેટ ફાળવવામાં આવ્યું છે. પાણીના વ્યવસ્થાપન માટે પણ મહત્વનું પગલું ભરતા, ગાંધીનગર મહાનગરપાલિકાએ જાસપુર ખાતેના તેના 100 એમએલડી સીવરેજ ટ્રીટમેન્ટ પ્લાન્ટનો લાભ ઔડાને આપવાનું નક્કી કર્યું છે, જ્યાં ઔડાનું 27 એમએલડી પાણી ટ્રીટ કરવામાં આવશે. 2030 સુધીમાં ગાંધીનગર એક સ્માર્ટ અને ગ્લોબલ સિટી તરીકે ઉભરી આવશે તે નક્કી છે.
