ગાંધીનગરના અડાલજ વિસ્તારમાં વ્યાજખોરોનો આતંક સામે આવ્યો છે. 10% વ્યાજે 20 લાખ લીધા બાદ પરિવારે 40 લાખ ચૂકવ્યા છતાં, વ્યાજખોરો છરી લઈને ઘરમાં ઘૂસ્યા અને વૃદ્ધ પર હુમલો કર્યો. જાણો શું છે સમગ્ર મામલો અને પોલીસે શું કાર્યવાહી કરી.
ગાંધીનગર, રવિવાર
ગાંધીનગરના અડાલજ વિસ્તારમાં વ્યાજખોરોનો ત્રાસ અને હિંસાની એક ચોંકાવનારી ઘટના સામે આવી છે. જ્યાં વ્યાજની વસૂલાત માટે ત્રણ આરોપીઓ છરી લઈને એક સિનિયર સિટીઝનના ઘરમાં ઘૂસી ગયા અને હુમલો કર્યો હતો. આ સમગ્ર ઘટના સીસીટીવી કેમેરામાં કેદ થઈ છે.
20 લાખ સામે 40 લાખ ચૂકવ્યા, છતાં ધમકી
અડાલજ પોલીસ સ્ટેશનમાં નોંધાયેલી ફરિયાદ પ્રમાણે, પીડિત પરિવારના પુત્રએ આરોપીઓ વિશાલ દેસાઈ, આનંદ દેસાઈ અને ચેતન દેસાઈ પાસેથી 10 ટકાના ઊંચા વ્યાજ દરે 20 લાખની રકમ ઉછીની લીધી હતી.
પરિવારે પોલીસને જણાવ્યું છે કે, તેમણે અત્યાર સુધીમાં માત્ર વ્યાજ પેટે જ કુલ 40 લાખથી વધુની રકમ ચૂકવી દીધી છે. આટલી મોટી રકમ ચૂકવ્યા છતાં, આરોપીઓ સતત ધમકાવીને વધુ પૈસાની ખંડણી કરી રહ્યા હતા. પરિવારે એવો પણ આક્ષેપ કર્યો છે કે, પુત્રએ પોતાના એક મિત્રની મદદ કરવા માટે આ વ્યાજખોરો પાસેથી પૈસા લીધા હતા અને આ રીતે તે તેમની જાળમાં ફસાયો હતો.
છરી બતાવી ધમકાવ્યા, પુત્રવધૂને ઈજા
ફરિયાદમાં જણાવ્યા મુજબ, આરોપીઓએ હિંમતભેર બળજબરીથી પીડિતના ઘરમાં પ્રવેશ કર્યો હતો. ઘરમાં રહેલા લોકોને છરી બતાવીને ધમકીઓ આપી હતી. આ દરમિયાન થયેલી ઝપાઝપીમાં સિનિયર સિટીઝનના પુત્રવધૂને હાથમાં ઈજા પણ પહોંચી હતી. ઘરના વૃદ્ધ પર હુમલો કરાયો હતો. આ ઘટના બાદ આખો પરિવાર ભય અને તણાવ હેઠળ છે.
પોલીસે ગુનો નોંધી તપાસ શરૂ કરી
આ ગંભીર બનાવને પગલે, અડાલજ પોલીસે તાત્કાલિક કાર્યવાહી કરી છે. પોલીસે નાણાકીય વિવાદ, ગેરકાયદેસર વ્યાજખોરી, અને ઘરમાં ઘૂસીને હુમલો કરવાના સંદર્ભમાં ગુનો નોંધીને તપાસ શરૂ કરી દીધી છે.
