હવામાન વિભાગના જણાવ્યા અનુસાર, આવનારા 24 કલાકમાં ઉત્તર પ્રદેશ, પશ્ચિમી રાજસ્થાન, જમ્મુ-કાશ્મીર, હિમાચલ પ્રદેશ, ઉત્તરાખંડ, પંજાબ, હરિયાણા, મધ્ય પ્રદેશ, છત્તીસગઢ, ઓડિશા, ઝારખંડ, બિહાર, પશ્ચિમ બંગાળ, સિક્કિમ, અને અંદામાન-નિકોબારમાં ભારે વરસાદનું એલર્ટ જાહેર કરવામાં આવ્યું છે.
નવી દિલ્હી, શનિવાર
દેશમાં ચોમાસાનું આગમન થઈ ચૂક્યું છે અને તેની અસર વિવિધ રાજ્યોમાં જોવા મળી રહી છે. એક તરફ જ્યાં દિલ્હી-NCRના લોકો ભેજવાળી ગરમીથી પરેશાન છે, ત્યાં બીજી તરફ ગુજરાત અને મહારાષ્ટ્ર સહિત ઘણા રાજ્યોમાં ભારે વરસાદને કારણે પૂર જેવી સ્થિતિ સર્જાઈ છે. ભારતીય હવામાન વિભાગ (IMD) એ આજે એટલે કે શનિવારે દેશના અનેક રાજ્યોમાં મુશળધાર વરસાદની આગાહી કરી છે.
આગામી 24 કલાક માટે વરસાદનું એલર્ટ
હવામાન વિભાગના જણાવ્યા અનુસાર, આવનારા 24 કલાકમાં ઉત્તર પ્રદેશ, પશ્ચિમી રાજસ્થાન, જમ્મુ-કાશ્મીર, હિમાચલ પ્રદેશ, ઉત્તરાખંડ, પંજાબ, હરિયાણા, મધ્ય પ્રદેશ, છત્તીસગઢ, ઓડિશા, ઝારખંડ, બિહાર, પશ્ચિમ બંગાળ, સિક્કિમ, અને અંદામાન-નિકોબારમાં ભારે વરસાદનું એલર્ટ જાહેર કરવામાં આવ્યું છે. આ સમયગાળા દરમિયાન 40-50 કિલોમીટર પ્રતિ કલાકની ઝડપે ભારે પવન ફૂંકાવાની પણ શક્યતા છે.
પશ્ચિમ બંગાળમાં ભારે વરસાદની શક્યતા
પશ્ચિમ બંગાળના કેટલાક જિલ્લાઓમાં ભારેથી અતિ ભારે વરસાદ પડી શકે છે. દક્ષિણ બંગાળના જિલ્લાઓ જેવા કે ઉત્તર 24 પરગણા, પુરુલિયા, પૂર્વ અને પશ્ચિમ વર્ધમાન, ઝારગ્રામ, બાંકુરા અને હુગલીમાં 1 જુલાઈ સુધી ભારે વરસાદ પડવાની શક્યતા છે. આ ઉપરાંત, 29 જૂને દક્ષિણ 24 પરગણા અને 30 જૂને પૂર્વ મિદનાપુર, પશ્ચિમ મિદનાપુર, ઝારગ્રામ, બાંકુરા અને હુગલીમાં પણ ભારે વરસાદની આગાહી કરવામાં આવી છે.
આંધ્ર પ્રદેશમાં તોફાની વરસાદનું એલર્ટ
આંધ્ર પ્રદેશ માટે પણ હવામાન વિભાગે શુક્રવારથી આગામી પાંચ દિવસ સુધી વીજળી, ભારે પવન અને વાવાઝોડાની આગાહી કરી છે. IMD અનુસાર, આંધ્ર પ્રદેશના તટીય વિસ્તારોમાં 40થી 50 કિલોમીટર પ્રતિ કલાકની ઝડપે પવન ફૂંકાવાની સંભાવના છે.
ઉત્તરપૂર્વ અને દક્ષિણ ભારતમાં હવામાન અપડેટ
આગામી 7 દિવસ દરમિયાન, ઉત્તરપૂર્વ ભારતમાં મોટાભાગના સ્થળોએ ભારે પવન સાથે હળવો થી મધ્યમ વરસાદ પડી શકે છે. કેટલાક સ્થળોએ ભારે વરસાદ પણ નોંધાઈ શકે છે.
દક્ષિણ ભારતમાં, શુક્રવારે કેરળ અને તમિલનાડુમાં છૂટાછવાયા સ્થળોએ ભારે વરસાદની સંભાવના છે. 28-30 જૂન દરમિયાન કર્ણાટક, દરિયાકાંઠાના આંધ્ર પ્રદેશ, તેલંગાણાના યાનમ અને રાયલસીમામાં 40-60 કિમી પ્રતિ કલાકની ઝડપે પવન ફૂંકાશે.
