NEET કૌભાંડમાં મોટો ખુલાસો! અસલી વિદ્યાર્થીની જગ્યાએ ડમી ઉમેદવાર બેસાડવા 40 લાખની ડીલ થઈ હતી. બાયોમેટ્રિક ચેકિંગમાં ભાંડો ફૂટતા 14 લોકોની ધરપકડ. વાંચો લેટેસ્ટ અપડેટ.
બિહાર, મંગળવાર
મેડિકલ પ્રવેશ પરીક્ષા NEET ને લઈને રોજેરોજ નવા અને ચોંકાવનારા ખુલાસા થઈ રહ્યા છે. હવે બિહારમાંથી નીટ-યુજી રી-એક્ઝામ કૌભાંડનો એક મોટો મામલો સામે આવ્યો છે. અહીં પરીક્ષામાં પાસ કરાવવા માટે કામ કરતી એક સોલ્વર ગેંગનું મોટું નેટવર્ક પકડાયું છે. પરીક્ષા કેન્દ્ર પર બાયોમેટ્રિક ચેકિંગમાં ડમી વિદ્યાર્થી (સોલ્વર) પકડાયો. અસલી ઉમેદવારની જગ્યાએ પરીક્ષા આપવા 30 થી 40 લાખ રૂપિયાની મોટી ડીલ થઈ હતી. પોલીસે આ મોટા કૌભાંડમાં અત્યાર સુધીમાં 14 લોકોની ધરપકડ કરી છે. મેડિકલ કોલેજના 3 વિદ્યાર્થીઓ મોબાઈલ સ્વિચ ઓફ કરીને ફરાર થઈ ગયા છે.
બાયોમેટ્રિક વેરિફિકેશનમાં ફૂટ્યો ભાંડો
મળતી માહિતી મુજબ, લખીસરાઈ જિલ્લાના એક પરીક્ષા કેન્દ્ર પરથી શરૂ થયેલી પોલીસ તપાસ હવે નાલંદાની જાણીતી પાવાપુરી મેડિકલ કોલેજ સુધી પહોંચી ગઈ છે. આ આખો કૌભાંડ ત્યારે પકડાયો જ્યારે પરીક્ષા સેન્ટર પર વિદ્યાર્થીઓનું બાયોમેટ્રિક વેરિફિકેશન ચાલી રહ્યું હતું. આ ચેકિંગ દરમિયાન અસલી ઉમેદવાર સંજીતની જગ્યાએ મંતોષ નામનો એક ડમી વિદ્યાર્થી (સોલ્વર) પરીક્ષા આપતો રંગેહાથ ઝડપાઈ ગયો હતો.
આ મામલો સામે આવતા જ પોલીસે તાત્કાલિક એક્શન લીધા હતા. પોલીસે નકલી ઉમેદવાર મંતોષ, અસલી ઉમેદવાર સંજીત અને તેના ભાઈની ધરપકડ કરી હતી. એટલું જ નહીં, આ કૌભાંડમાં મદદ કરવા બદલ બાયોમેટ્રિક ટીમના 6 કર્મચારીઓ સહિત કુલ 14 લોકોને જેલના સળિયા પાછળ ધકેલી દીધા છે.
40 લાખ રૂપિયાની મોટી ડીલનો ખુલાસો
પોલીસની કડક પૂછપરછમાં પકડાયેલા સોલ્વર મંતોષે એક મોટો ખુલાસો કર્યો છે, જે સાંભળીને સૌ કોઈ ચોંકી ગયા છે. તેણે કબૂલાત કરી છે કે અન્ય વિદ્યાર્થીના નામે પરીક્ષામાં બેસવા માટે 30 થી 40 લાખ રૂપિયામાં ડીલ નક્કી કરવામાં આવી હતી. આ ખેલ પાછળ પાવાપુરી મેડિકલ કોલેજના વિદ્યાર્થી રવિશંકર ઉર્ફે સમ્રાટનું નામ ખુલ્યું છે. રવિશંકરે જ મંતોષને મોટી રકમની લાલચ આપીને આ ગેરકાયદેસર કામ કરવા માટે તૈયાર કર્યો હતો.
મેડિકલ કોલેજના 3 વિદ્યાર્થીઓ થયા ફરાર
આ ચોંકાવનારા ખુલાસા પછી પાવાપુરી મેડિકલ કોલેજ (VMIMS) ના કેમ્પસમાં ભારે હડકંપ મચી ગયો છે. આ કૌભાંડના મૂળ સુધી પહોંચવા જ્યારે પોલીસની ટીમ કોલેજ કેમ્પસમાં પહોંચી અને MBBS ના વિદ્યાર્થીઓની હાજરી ચેક કરી, ત્યારે એક મોટી બાબત સામે આવી. મુખ્ય શંકાસ્પદ રવિશંકર ઉર્ફે સમ્રાટ સહિત કુલ 3 વિદ્યાર્થીઓ કોલેજમાંથી ગાયબ જોવા મળ્યા હતા.
હાલમાં આ ત્રણેય શંકાસ્પદ વિદ્યાર્થીઓના મોબાઈલ ફોન પણ સ્વિચ ઓફ આવી રહ્યા છે. પોલીસ દ્વારા આ ફરાર આરોપીઓને ઝડપી પાડવા માટે સતત અલગ અલગ જગ્યાઓ પર દરોડા પાડવામાં આવી રહ્યા છે. આ કેસમાં આગામી દિવસોમાં હજુ પણ કેટલાક મોટા માથાઓના નામ ખુલે તેવી પૂરી શક્યતા છે.
