ગાંધીનગર જિલ્લામાં બિનઅધિકૃત ખનન અને વહન કરતા ભૂમાફિયાઓ સામે ભૂસ્તર તંત્રની લાલ આંખ. માત્ર 3 દિવસમાં 19 ડમ્પર સહિત 20 વાહનો જપ્ત કરીને કુલ 6 કરોડનો મુદ્દામાલ ઝડપી પાડ્યો છે અને 32.14 લાખનો દંડ વસૂલ્યો.
ગાંધીનગર, ગુરૂવાર
ગાંધીનગર જિલ્લામાં લાંબા સમયથી ચાલી રહેલા બિનઅધિકૃત રેતી, બ્લેકટ્રેપ (કપચી), અને માટીના ખનન તથા વહન સામે ભૂસ્તર વિભાગના તંત્રએ કડક વલણ અપનાવ્યું છે. ભૂમાફિયાઓની ગેરકાયદેસર પ્રવૃત્તિઓ પર લગામ કસવા માટે ભૂસ્તર વિભાગે છેલ્લા ત્રણ દિવસથી સતત રોડ ચેકિંગની ઝુંબેશ હાથ ધરી હતી, જેના પરિણામે મોટી સફળતા મળી છે.
6 કરોડનો મુદ્દામાલ જપ્ત, 20 વાહનો પકડાયા
ગાંધીનગરના ભૂસ્તર વિજ્ઞાન અને ખનીજ તંત્રની ક્ષેત્રીય ટીમે જિલ્લાના અનેક વિસ્તારોમાં આકસ્મિક તપાસ કરી હતી. રાંધેજા, અડાલજ, ખોરજ, છત્રાલ, વડસર, કલોલ, બોરીસણા, ગીયોડ, શેરથા, નારદીપુર, લવારપુર અને ડભોડા જેવા સ્થળોએ ચેકિંગ હાથ ધરવામાં આવ્યું હતું.
આ તપાસ દરમિયાન, ભૂસ્તર તંત્રની ટીમે કુલ 20 વાહનો અને મશીનરી જપ્ત કરી હતી. આ જપ્ત કરાયેલા મુદ્દામાલમાં 19 ડમ્પર અને 1 લોડર મશીનનો સમાવેશ થાય છે, જેની કુલ કિંમત આશરે ₹6 કરોડ જેટલી ગણવામાં આવી છે.
કયા વાહનો કયા કારણોસર પકડાયા?
તંત્રની તપાસમાં જાણવા મળ્યું કે પકડાયેલા વાહનોમાંથી મોટાભાગના વાહનો કાયદાનું ઉલ્લંઘન કરી રહ્યા હતા:
11 ડમ્પર વાહનો: આ ડમ્પરો રોયલ્ટી પાસ (સરકારની પરવાનગી) વગર જ ખનીજનું વહન કરતા ઝડપાયા હતા.
8 ડમ્પર વાહનો: આ ડમ્પરો પાસે રોયલ્ટી પાસ હોવા છતાં, નિર્ધારિત મર્યાદા કરતાં વધુ એટલે કે ઓવરલોડ ખનીજનું વહન કરી રહ્યા હતા.
1 લોડર મશીન: ડભોડા સીમ વિસ્તારમાં સાદી રેતીનો બિનઅધિકૃત સંગ્રહ કરીને તેને ડમ્પર (GJ-18-BT-9242)માં ભરતી વખતે લોડર મશીન સાથે પકડી પાડવામાં આવ્યું હતું.
32.14 લાખનો દંડ વસૂલવામાં આવ્યો
ગુજરાત મિનરલ નિયમો-2027 હેઠળ, આ તમામ જપ્ત કરાયેલા વાહન/મશીન માલિકો પાસેથી અત્યાર સુધીમાં કુલ 32.14 લાખની દંડકીય રકમ વસૂલવામાં આવી છે. આ ઉપરાંત, બિનઅધિકૃત રીતે સંગ્રહ કરેલા સાદી રેતીના જથ્થાની માપણી કરીને તે માટેનો દંડ વસૂલવાની કાર્યવાહી પણ તંત્ર દ્વારા આગળ ધપાવવામાં આવશે.
