ઉલ્લેખનીય છે કે વડોદરામાં છેલ્લા 24 કલાકમાં આ બીજી મોટી ધમકી છે. ગઈકાલે, શહેરની નવરચના સ્કૂલને પણ બોમ્બથી ઉડાવી દેવાની ધમકી મળી હતી
વડોદરા, મંગળવાર
વડોદરામાં ફરી એકવાર બોમ્બની ધમકીનો મામલો સામે આવ્યો છે. શહેરની જાણીતી રિફાઇનરી સ્કૂલને ઇમેલ દ્વારા બોમ્બથી ઉડાવી દેવાની ધમકી મળી છે. આ ઘટના સવારે 6.47 વાગ્યે બની હતી, અને તાત્કાલિક ધોરણે પોલીસને જાણ કરવામાં આવતા, તેઓ ઘટનાસ્થળે પહોંચી ગયા હતા. પોલીસની ટીમે રિફાઇનરીની સુરક્ષા એજન્સી સાથે મળીને તપાસ શરૂ કરી દીધી છે.
ધમકી મળતા જ પરિસરમાં ભયનો માહોલ
રિફાઇનરી સ્કૂલને બોમ્બથી ઉડાવી દેવાની ધમકી મળતા જ સમગ્ર પરિસરમાં ભય અને અફરાતફરીનો માહોલ છવાઈ ગયો હતો. પોલીસ અને સુરક્ષા એજન્સી દ્વારા સ્કૂલ અને આસપાસના વિસ્તારોમાં સર્ચ ઓપરેશન હાથ ધરવામાં આવ્યું છે. ડોગ સ્ક્વોડ અને બોમ્બ ડિસ્પોઝલ સ્ક્વોડ પણ તપાસમાં જોડાઈ છે.
ગઈકાલે પણ શહેરને ટાર્ગેટ કરાયું હતું
ઉલ્લેખનીય છે કે વડોદરામાં છેલ્લા 24 કલાકમાં આ બીજી મોટી ધમકી છે. ગઈકાલે, શહેરની નવરચના સ્કૂલને પણ બોમ્બથી ઉડાવી દેવાની ધમકી મળી હતી, જેના કારણે સ્કૂલ બંધ રાખવામાં આવી હતી. જોકે, તપાસના અંતે કંઈપણ વાંધાજનક મળ્યું ન હતું. આ ઉપરાંત, ગઈકાલે જ વડોદરાથી દિલ્હી જતી એર ઇન્ડિયાની ફ્લાઇટને પણ બોમ્બથી ઉડાવી દેવાની ધમકી આપવામાં આવી હતી. આ મામલે CISF એ ધમકી આપનાર મુસાફરને ઝડપી પાડ્યો હતો, અને ફ્લાઇટની સંપૂર્ણ તપાસ બાદ તેને રવાના કરવામાં આવી હતી.
પોલીસ એલર્ટ પર, તપાસ ચાલુ
વડોદરામાં ઉપરાછાપરી બોમ્બની ધમકીઓ મળતા પોલીસ હાઈ એલર્ટ પર છે. તમામ ઘટનાઓની ગંભીરતાથી નોંધ લઈને, સ્થાનિક પોલીસ અને ક્રાઇમ બ્રાન્ચ દ્વારા સઘન તપાસ ચલાવવામાં આવી રહી છે. આ ધમકીઓ પાછળ કોનો હાથ છે અને તેનો હેતુ શું છે તે દિશામાં તપાસ ચાલી રહી છે.
