અમેરિકાના હુમલાના જવાબમાં ઈરાને જોર્ડન, કુવૈત અને બહેરીનમાં આવેલા યુએસ સૈન્ય મથકો પર મિસાઇલ અને ડ્રોન હુમલા કરીને યુદ્ધને ઘાતક વળાંક આપ્યો છે.
અમેરિકા અને ઈરાન વચ્ચેનો સંઘર્ષ હવે સીધા યુદ્ધમાં ફેરવાઈ રહ્યો છે. તાજેતરમાં અમેરિકા દ્વારા ઈરાનના પાંચ રાજ્યો પર કરવામાં આવેલા હુમલાઓના જવાબમાં ઈરાને સોમવારે (13 જુલાઈ) વળતો પ્રહાર કર્યો છે. ઈરાનના ‘ઈસ્લામિક રિવોલ્યુશનરી ગાર્ડ કોર્પ્સ’ (IRGC) એ કુવૈત, બહેરીન અને જોર્ડનમાં આવેલા અમેરિકી સૈન્ય મથકોને નિશાન બનાવીને ઘાતક મિસાઈલો અને ડ્રોન હુમલા કર્યા છે.
ઈરાનનો વળતો હુમલો: મુખ્ય સ્થળો નિશાન પર
ઈરાને આક્રમક વલણ અપનાવતા નીચે મુજબના સ્થળો પર હુમલો કરવાનો દાવો કર્યો છે:
-
જોર્ડન: પ્રિન્સ હસન એર બેઝ પર મિસાઈલ ડેપો અને ફ્યુઅલ ટેન્કને નિશાન બનાવીને બોમ્બમારો કર્યો.
-
બહેરીન: યુએસ ડ્રોન કમાન્ડ સેન્ટર પર હુમલો.
-
કુવૈત: ઓઈલ કંપનીના ઓફશોર ડ્રિલિંગ પ્લેટફોર્મ અને ઉત્તરીય સરહદ ચોકીઓ પર ડ્રોન હુમલા, જેમાં એક કાર્યકર ઘાયલ થયો હોવાના અહેવાલ છે.
જોર્ડન અને કુવૈતની સેનાએ દાવો કર્યો છે કે તેમની એર ડિફેન્સ સિસ્ટમે ઈરાન દ્વારા છોડવામાં આવેલી અનેક મિસાઈલોને હવામાં જ તોડી પાડી હતી.
અમેરિકાની જવાબી કાર્યવાહી
ફોક્સ ન્યૂઝના અહેવાલ મુજબ, અમેરિકી દળોએ ઈરાનના આ હુમલાઓના જવાબમાં ગત રાત્રે ઈરાની લશ્કરી ઠેકાણાઓ પર જબરદસ્ત હુમલા કર્યા છે. છેલ્લા ત્રણ દિવસમાં અમેરિકાએ ઈરાનના આશરે 300 થી વધુ લશ્કરી ઠેકાણાઓને નિશાન બનાવ્યા છે.
ડોનાલ્ડ ટ્રમ્પને ઈરાનની સીધી ચેતવણી
આ ઘટનાક્રમ વચ્ચે ઈરાને ડોનાલ્ડ ટ્રમ્પને સ્પષ્ટ ચેતવણી આપી છે કે, જો અમેરિકા દ્વારા હુમલાઓ બંધ કરવામાં નહીં આવે, તો ઈરાન સમગ્ર ક્ષેત્રમાં આવેલા તમામ યુએસ મિલિટરી બેઝનો નાશ કરી દેશે. આ યુદ્ધ હવે મધ્ય-પૂર્વની સ્થિરતા માટે મોટો ખતરો બની ગયું છે.
