જો તમે YouTube પર વીડિયો બનાવીને પૈસા કમાઓ છો, તો આ 7 ભૂલો ટાળો. કોપીરાઇટથી લઈને રિયૂઝ્ડ કન્ટેન્ટ સુધી, જાણો કયા કારણોસર તમારી ચેનલનું મોનિટાઇઝેશન બંધ થઈ શકે છે અને તમારી મહેનત પર પાણી ફરી શકે છે.
અમદાવાદ, સોમવાર
આજના સમયમાં YouTube માત્ર મનોરંજનનું માધ્યમ નથી, પરંતુ લાખો લોકો માટે કમાણીનો એક મોટો સ્ત્રોત પણ છે. યુટ્યુબ તેના પાર્ટનર પ્રોગ્રામ (YPP) દ્વારા ક્રિએટર્સને તેમના વીડિયો પર આવતી જાહેરાતોમાંથી આવકનો હિસ્સો આપે છે. પરંતુ, ઘણા ક્રિએટર્સ કેટલાક નિયમોની અવગણના કરે છે, જેના કારણે તેમની ચેનલનું મોનિટાઇઝેશન બંધ થઈ શકે છે અને કમાણી અટકી શકે છે.
ચાલો જાણીએ એવી 7 સામાન્ય ભૂલો વિશે, જે તમારી YouTube ચેનલ માટે ખતરો બની શકે છે.
1. કૉપિરાઇટ કન્ટેન્ટનો ઉપયોગ
આ ભૂલ મોટાભાગના નવા ક્રિએટર્સ કરે છે. જો તમે તમારા વીડિયોમાં કોઈ બીજાનું ગીત, મૂવીની ક્લિપ અથવા અન્ય કોઈ વીડિયોનો ભાગ પરવાનગી વગર વાપરો છો, તો તેના પર કૉપિરાઇટ ક્લેમ અથવા સ્ટ્રાઇક આવી શકે છે. આવી સ્થિતિમાં, તે વીડિયોમાંથી થતી બધી કમાણી મૂળ માલિકને મળી જાય છે અને વારંવાર ભૂલ કરવાથી ચેનલ બંધ પણ થઈ શકે છે.
2. બીજાના વીડિયોનો ફરીથી ઉપયોગ
ઘણા લોકો ઇન્ટરનેટ પર વાયરલ થયેલા વીડિયો, સોશિયલ મીડિયા રીલ્સ અથવા ટીવી શોના ભાગોને ભેગા કરીને વીડિયો બનાવી દે છે. યુટ્યુબની પોલિસી મુજબ, જો તમે કોઈ બીજાના કન્ટેન્ટમાં પોતાનો અવાજ, કોમેન્ટ્રી કે કોઈ નવી ક્રિએટિવિટી ઉમેર્યા વગર સીધો ઉપયોગ કરો, તો તેને ‘રિયૂઝ્ડ કન્ટેન્ટ’ ગણવામાં આવે છે. આ કારણે પણ ચેનલનું મોનિટાઇઝેશન રદ થઈ શકે છે.
3. વાંધાજનક ભાષા કે કન્ટેન્ટ
YouTube હવે વીડિયોમાં વપરાતી ભાષાને લઈને ખૂબ જ કડક બની ગયું છે. જો વીડિયોની શરૂઆતમાં જ ગાળો, અપશબ્દો અથવા કોઈને અપમાનિત કરતી ભાષાનો ઉપયોગ કરવામાં આવે, તો તે વીડિયો પર જાહેરાતો મર્યાદિત કરી દેવામાં આવે છે અથવા ચેનલ ડિમોનેટાઇઝ થઈ શકે છે. યૌન શોષણ કે વાંધાજનક દ્રશ્યો પર તો તાત્કાલિક પ્રતિબંધ મુકવામાં આવે છે.
4. હિંસક અને ડરામણા દ્રશ્યો
જે વીડિયોમાં લોહી, હત્યા, ગંભીર અકસ્માત, પ્રાણીઓ પર અત્યાચાર કે એવા કોઈ દ્રશ્યો હોય જે દર્શકોને વિચલિત કરી શકે, તેના પર જાહેરાતો બતાવવામાં આવતી નથી. જો કોઈ ન્યૂઝ ચેનલ પણ આવા દ્રશ્યોને બ્લર કર્યા વગર બતાવે તો તેને પણ ડિમોનેટાઇઝ કરવામાં આવી શકે છે.
5. નફરત ફેલાવતું ભાષણ
કોઈપણ ધર્મ, જાતિ, લિંગ કે સમુદાય વિરુદ્ધ નફરત ફેલાવવી, ધમકીઓ આપવી અથવા કોઈને ઓનલાઈન હેરાન કરવા એ YouTube પર ગંભીર ગુનો છે. આવા કિસ્સામાં માત્ર વીડિયો જ નહીં, પરંતુ ચેનલને પણ હંમેશા માટે હટાવી દેવામાં આવે છે અને કાયદાકીય પગલાં પણ લેવાઈ શકે છે.
6. સંવેદનશીલ મુદ્દાઓ પર કન્ટેન્ટ
ઘણીવાર યુદ્ધ, આતંકવાદી હુમલા, કુદરતી આફતો અથવા રાજકીય અશાંતિ જેવા વિષયો પર બનાવેલા વીડિયો ભલે માહિતી આપવાના હેતુથી બનાવ્યા હોય, પરંતુ જાહેરાતકર્તાઓ આવા કન્ટેન્ટ પર જાહેરાત આપવાનું પસંદ કરતા નથી. YouTube આવા વિષયોને ‘સંવેદનશીલ’ ગણીને તેના પર આવતી જાહેરાતોને મર્યાદિત કરી શકે છે.
7. આ ભૂલોથી બચવા શું કરવું?
YouTube પર લાંબા સમય સુધી સફળ રહેવા માટે સારું કન્ટેન્ટ બનાવવાની સાથે તેના નિયમોનું પાલન કરવું પણ એટલું જ જરૂરી છે.
હંમેશા પોતાનું ઓરિજિનલ કન્ટેન્ટ બનાવો.
જો કોઈ બીજાના કન્ટેન્ટનો ઉપયોગ કરવો પડે, તો જરૂરી લાયસન્સ લો અથવા ‘ફેર યુઝ’ પોલિસી સમજીને તેનો ઉપયોગ કરો.
વીડિયો અપલોડ કરતી વખતે ‘સેલ્ફ-સર્ટિફિકેશન’ ફોર્મ સાવચેતીપૂર્વક ભરો. જો તમને લાગે કે તમારો વીડિયો કોઈ નિયમનું ઉલ્લંઘન કરી શકે છે, તો તેને જાહેરાતો માટે મર્યાદિત રાખો. આમ કરવાથી તમારી ચેનલની વિશ્વસનીયતા બની રહેશે.
