PSI Recruitment: ગુજરાત હાઈકોર્ટે PSI ભરતી 2021ના કેસમાં મહત્વનો ચુકાદો આપ્યો છે. વિષય દીઠ 40% માર્ક્સના ગૌણ સેવા પસંદગી બોર્ડના નિર્ણયને યોગ્ય ઠેરવ્યો છે. જાણો સમગ્ર વિવાદ અને કોર્ટનું અવલોકન આ રિપોર્ટમાં.
અમદાવાદ, બુધવાર
PSI Recruitment: પોલીસ સબ ઈન્સ્પેક્ટર (PSI) વર્ગ-3ની ભરતીને લઈને ચાલી રહેલા એક મોટા વિવાદનો અંત આવી ગયો છે. ગુજરાત હાઈકોર્ટે એક મહત્વપૂર્ણ ચુકાદામાં ગૌણ સેવા પસંદગી બોર્ડ (GSSSB)ના નિર્ણયને યોગ્ય ઠેરવ્યો છે, જે મુજબ ઉમેદવારોએ દરેક વિષયમાં ઓછામાં ઓછા 40% ગુણ મેળવવા ફરજિયાત છે. કોર્ટે કુલ ગુણના આધારે નવું સિલેક્શન લિસ્ટ બનાવવાની માંગ કરતી અરજીને ફગાવી દીધી છે.
શું હતો સમગ્ર વિવાદ?
વાત વર્ષ 2021ની PSI ભરતીની છે. આ ભરતી માટેની જાહેરાતમાં ઉલ્લેખ હતો કે ઉમેદવારોએ લેખિત પરીક્ષામાં 40% ગુણ મેળવવાના રહેશે. કેટલાક ઉમેદવારોએ આ નિયમનો અર્થ એવો કર્યો કે તેમને પરીક્ષાના કુલ ગુણમાંથી 40% લાવવાના છે. જોકે, GSSSBએ પરિણામ જાહેર કર્યું ત્યારે સ્પષ્ટ કર્યું કે આ 40%નો નિયમ દરેક વિષય માટે અલગ-અલગ લાગુ પડશે.
આ નિર્ણયને કારણે, જે ઉમેદવારોએ કુલ મળીને 40%થી વધુ ગુણ મેળવ્યા હતા પરંતુ કોઈ એક વિષયમાં 40%થી ઓછા માર્ક્સ હતા, તેઓ અસફળ જાહેર થયા. આથી, મે-2023માં લેવાયેલી મેઈન્સ પરીક્ષામાં બેઠેલા 44 ઉમેદવારોમાંથી માત્ર 10 જ પાસ થયા, જ્યારે 31 ઉમેદવારો નાપાસ થયા. આ નિર્ણયને પડકારતા કેટલાક ઉમેદવારોએ હાઈકોર્ટમાં અરજી કરી હતી.
કોર્ટમાં શું દલીલો થઈ?
અરજદારોના વકીલે કોર્ટમાં રજૂઆત કરી કે ભરતીની જાહેરાત કે ભરતી નિયમોમાં ક્યાંય પણ વિષય દીઠ 40% ગુણનો સ્પષ્ટ ઉલ્લેખ નથી. બોર્ડનો આ નિર્ણય નિયમોની વિરુદ્ધ છે અને આ રીતે પાછળથી સ્પષ્ટતા કરવી એ યોગ્ય નથી.
તેની સામે, સરકારી વકીલે દલીલ કરી કે ભરતીનો મુખ્ય હેતુ એવા ઉમેદવારોને પસંદ કરવાનો છે જેઓ દરેક વિષયમાં નિપુણ હોય. જો કોઈ ઉમેદવાર એક વિષયમાં ખૂબ સારા અને બીજામાં ખૂબ નબળા માર્ક્સ લાવે, તો તે યોગ્ય પસંદગી ન ગણાય. બોર્ડે આપેલી સ્પષ્ટતા ઉમેદવારોની વધુ સારી સમજ માટે હતી, તેને નિયમમાં ફેરફાર ગણી શકાય નહીં.
હાઈકોર્ટનું મહત્વનું અવલોકન
જસ્ટીસ નિખિલ કારિયલે આ કેસમાં ખૂબ જ સ્પષ્ટ અને મહત્વનું અવલોકન કર્યું. તેમણે જણાવ્યું કે જાહેરાતમાં “લેખિત પરીક્ષા” શબ્દનો ઉલ્લેખ છે, જે દરેક વિષયના પેપરને લાગુ પડે છે, નહીં કે ફક્ત કુલ ગુણને. કોર્ટે કહ્યું કે ભરતી નિયમોનો હેતુ સૌથી પ્રતિભાશાળી ઉમેદવારોને શોધવાનો છે, જેમને તમામ વિષયોનું સંતુલિત જ્ઞાન હોય. જો અરજદારોની માંગ સ્વીકારવામાં આવે, તો ભરતી પ્રક્રિયાનો મૂળ હેતુ જ નિષ્ફળ જશે.
